(کابل ټکی کام ۱۳۹۶ مرغومی ۲۱ فرید افغان)
د امریکا د بهرنیو چارو وزارت په یوه اعلامیه کې له خپلو اتباعو غوښتي چې د جدي امنیتي خطرونو له کبله افغانستان ته سفر ونه کړي .
په اعلامیه کې امریکایي اتباعو ته د پاکستان په اړوند هم لارښوونه شوې چې باید هغه هیواد ته په ورتګ کې له احتیاط کار واخلي.
اعلامیه زیاتوي؛ افغانستان په څلورمه درجه کې امنیتي تدابیر لري نو په همدې موخه د مخالفینو د حملو د زیاتوالي،ورځنیو پیښو، ملکي بې ثباتی او نورو ستونزو له کبله باید امریکایي وګړي افغانستان ته لاړ نه شي.
همداراز ویل شوي چې امریکایي اتباع که پاکستان ته ځي نو لومړی دې د خپل هیواد له بهرنیو چارو وزارت سره مشوره وکړي او ټول اړخونه دې وسنجوي بیا دې سفر وکړي.
خو د دې هیواد له بلوچستان، خیبر پښتون خوا آیالتونو او قبایلو سیمو د ورتګ څخه بیا هم په جدي توګه منع شوي دي.
د امریکایانو د درجه بندي تر مخه پاکستان دریمه او افغانستان څلورمه درجه امنیت لري.
دا راپور داسې مهال رسنیز کیږي چې تیره ورځ د مسیحیانو نړیوال سازمان ‹‹اوپن دروز›› هم خبر ورکړی و، چې افغانستان د عیسویانو لپاره د نړۍ په کچه دوهم خطرناک هیواد ده.
امریکا همداراز خپل اتباعو ته امر کړی چې دوهمه درجه امنو هیوادونو ته باید په سفر کې له احتیاط کار واخلي او هغه چې په لومړۍ درجه امنیت پکې تامین دی په آرام زړه تګ راتګ کولی شي.
