کلید ګروپ: په جنرال رازق برید پلان شوې دسیسه وه

(کابل ټکی کام ۱۳۹۶ سلواغه ۲۱ فرید افغان)

څو ورځې وړاندې له کندهار څخه رسنیو خبر ورکړ چې په جنرال رازق د ترتیب شوي تکتیکي برید مخه یې نیولې چې په خبره یې د کلید د یو خبریال له لوري په یوه مایک کې چاودیدونکي توکي ځای پرځای شوي و او پر وخت سره کشف شول.

د دې رادیو مسؤل نن له رسنیو سره په خبرو کې ویلي چې تورن خبریال احمدالله څرګند درۍ میاشتې او ۱۷ ورځې وړاندې د ملي امنیت ادارې د وسلوالو سره د لاس لرلو په تور نیولی دی، چې د نوموړي له نیولو وروسته د ملي امنیت ریاست د څرګند دفتر تلاشي او بیا یې مهر لاک کړی و.
د مسؤل په خبره؛ ملي امنیت د تیرې سې شنبې په ورځ د سلواغې په ۱۷ نیټه له نویو څیړنو او تلاشۍ وروسته یاد دفتر بیرته د دې رادیو سرپرست ته سپارلی چې په وینا یې په دواړه ځله څیړنو کې استخباراتي ارګانونو هیڅ مشکوک شی نه دي موندلي.

د کلید مسؤل ویلي؛ د رادیو مسؤلین د دفتر د ورسپارلو په سبا د چهارشنبې په ورځ پر یو مشکوک مایک شکمن کیږي او دا موضوع له امنیتي اداراتو سره شریکوي.
د نوموړي په خبره؛ د امنیتي ځواکونو له راتګ سره موضوع بل رنګ اخلي چې ګواکې دا مایک پولیسو کشف کړی او د رازق د ترور په موخه ایښودل شوی و، په داسې حال کې چې مایک د رادیو مسؤلینو د ملي امنیت د دوځلي تلاشۍ وروسته کشف او امنیتي مسؤلینو ته یې سپارلی و.
د دفتر مسؤلین وایي چې د ملي امنیت له تلاشي وروسته د چاودیدونکو توکو ډک مایک موندل د یوې پټې دسیسې ښکارندویي کوي او باید په دې اړوند څیړنې وشي او نتایج دې له ولسونو سره شریک شي.
د کلید دفتر د مشر له څرګندونو ښکاري چې یاد ماین رازق ته نږدې کسانو د نوموړي د نوم اوچتولو او د کلید پرضد دوسیې جوړولو پخاطر ایښی دی.
د دفتر مشر همداراز ویلي چې امنیتي چارواکي دې اجازه نه ورکوي چې له دې موضوع څخه ځینې اشخاص او افراد خپله قهرمانۍ ثابته کړي .
دا په داسې حال کې ده چې تیرکال هم په کندهار ولایت کې په یوه تکتیکي چاودنه کې چې د متحده عرب اماراتو سفیر د سفارت دغړو او د کندهار د والي مرستیال په ګډون ګڼ شمیر کسان ووژل شول او د دې ولایت د والي په ګډون لسګونه نور ټپیان شول، هغه مهال د یاد برید پړه هم په رازق ور اچول شوې وه چې له چاودنې څو شیبې وړاندې یې سیمه پریښې وه.
د طالبانو په ګډون ټولو ښکیلو غاړو په یاده پیښه کې خپل لاس لرل رد کړي و او ترسره شویو څیړونو هم دا یو داخلي برید بللی وو.
د یادونې وړ ده چې په دې وروستیو کې د کندهار په ولایت کې د رازق ملیشو په هدفي وژنو لاس پورې کړی او په ورځنۍ توګه ګڼ ځوانان د دې وژنو ښکار کیږي.
مرکزي حکومت هم د رازق په خپلسریو سترګې پټې کړې او رازق هم د شمالي ټلوالې په ملتیا د ملي وحدت حکومت ته ټټر وهلی چې هیڅ څوک یې هم له واک څخه نه شي پرزولی.