رباني: د جمعيت ګوند به د خدام د ګوښه کېدو په اړه ژر خپل دريځ اعلان کړي
(کابل ټکی کام، ۱۳۹۶، سلواغې ۲۹) د جمعیت ګوند مشر صلاح الدين رباني د سمنګان والي عبدالکريم خدام د ګوښه کېدو په اړه غبرګون ښودلی او به خپله رسمي ټويټر پاڼه يې ليکلي، چې دی د ترکمن قوم ته درناوی لري، د هغوی غوښتنې ورته د اهميت وړ دي.
رباني زياته کړې، د سمنګان والي او د جمعيت ګوند د رهبري شورا غړی عبدالکريم خدام، تجره لرونکی او په کار پوه شخص دی او د نوموړي د ګوښه کېدو په اړه به ډېر ژر د جمعيت ګوند رهبري شورا خپل دريځ اعلان کړي.
تېره ورځ د سيمه ييزو ارګانونو خپلواکې ادارې اعلان وکړ، چې د پنځو ولايتونو ميدان وردګ، کندوز، لوګر، لغمان او سمنګان ولايتونو لپاره يې واليان تبديل کړي او نوي واليان ټاکل شوي دي.
چې د سمنګان لپاره عبدالطيف ابراهيمي د عبدالکریم خدام پر ځای ټاکل شوی خو د دغې ولايت ګوښه شوي والي نن په يوه ويډيو خبري غونډه کې رسنيو ته وويل، چې ده ته د ولسمشر او سيمه ييزو ارګانونو ادارې پريکړه ورته د منلو وړ نه ده او تر هغې به خپلې دندې ته دوام ورکړي، ترڅو چې د جمعيت ګوند پريکړه نه وي کړي.
دا دوهم والي دی چې د ولسمشر له دندې څخه د لرې کېدو په اړه ولسمشر غني فيصله نه مني او د خپلې دندې په دوام د اشرف غني تر پوښتنې لاندې راولي.
شاوخوا دوه مياشتې مخکې، د ولسمشرۍ ماڼۍ له لوري د بلخ والي عطانور ګوښه شو او پر ځای يې انجينير داود والي وټاکل شو، خو د دوو مياشتو په تېرېدو لا هم انجينير داود نه دی توانېدلی چې د والي په توګه په رسمي ډول خپله دنده پيل کړي.
د بلخ پخوانی جنجالي والي عطانور هره ورځ ارګ ته ګواښونه کوي وايي، چې تر هغو يې غوښتنې نه وي منل شوي خپلې دندې ته به دوام ورکوي.
