(کابل ټکی کام ۱۳۹۶ کب ۷ فرید افغان)
د کابل نیوز تلویزیون خبر ورکړی چې د امریکا تر ټولو بدنامې امنیتي کمپنۍ چې په سختو بشرضدو سرغړونو تورنه شبکه ده، د افغانستان د کانونو د لوټ په طمعه په کابل کې دفتر پرانیستی دی.
د دې امنیتي کمپنۍ مشر ایریک پرنس د امریکا د بهرنیو چارو وزارت ته د افغانستان د کانونو د امنیت ټینګولو مسوولیت په اړه پریزنټېشن وړاندې کړی او په کابل کې یې هم یو دفتر خلاص کړی.
یاد تلویزیون ته یوې باوري سرچينې ویلي، ایریک پرنس په خپل پرانبستي دفتر کې دوه تنه افغانان، چې په امنیتي برخه کې یې پوره تجربه درلوده د خپلو مشاورینو په توګه ګومارلي، خو لا معلومه نه ده چې دا دوه تنه افغان چارواکي څوک دي.
که څه هم د کانونو او پټرولیم وزارت ویاند عبدالقدیر مصطفي د کانونو د امنیت ساتنې په برخه کې له یوې امریکایي امنیتي کمپنۍ سره هر ډول اړیکه ردوي خو پر روڼتیا د څار بنسټ رئیس سید اکرام افضلي په همدې موخه له افغان چارواکو سره د ایریک پرنس د استازو خبرې اترې منلې دي.
د پټرولیم وزارت ویلي؛ دوی د کانونو په برخه کې د امریکایانو د پانګونې هرکلی کوي او ښه اقدام یې بولي.
دا په داسې حال کې ده چې؛ له تیرو ۱۷ کلونو را په دیخوا د افغانستان کانونه د مختلفو مافیایي کړیو او خپله د امریکایانو له خوا په غیرقانوني توګه استخراجیدل او اوس هم امریکا ویلي چې د افغانستان د جګړې مصارف به د دې هیواد له خوندي زیرمو پوره کوي.
امریکا هڅه کوي چې په دې توګه خپل مخ پر ځوړ اقتصاد د افغانستان له خوندي بډایه زیرمو ورغوي چې د اټکل ترمخه د دې زیرمو لګښت تر ۳ تریلیونه ډالره لوړ ده چې دا پیسې د چین د اقتصادي قدرت معادلې دي هغه هیواد چې اوس د نړۍ په کچه دوهم شتمن ځای لري .
شنونکي وایي؛ چې امریکا لا هم په افغانستان کې دخپلو موخو په لټه ده او د سیمې د هیوادونو د ممکنه ګواښونو لپاره د پوځي اډو تر جوړولو وروسته به د افغانستان په اقتصادي زیرمو پیل کوي .
