راپوتاژ: الماس خدرخېل —– امریکايي بدنامې پوځي کمپنۍ بلک واټر يو ځل بيا د دې هڅه پيل کړې چې د افغانستان پر کانونو ولکه ټينګه کړي.
يوې باوري سرچينې کابل نيوز ته ويلي، د بلک واټر کمپنۍ مشر ايريک پرنس د امريکا د بهرنيو چارو وزارت ته د افغانستان د کانونو د امنیت ټينګولو عرض پاڼه سپارلې تر څو يې مسئوليت دغې کمپنۍ ته وسپارل شي.
سرچينه زياتوي، د بلک واټر مشر په کابل کې خپل دفتر پرانيستلی او دوه تنه افغانان چې په امنيتي برخه کې پوره تجربه لري د مشاورينو په توګه ټاکلی دي.
تر اوسه بلک واټر کمپنۍ د کانونو قرارداد په ترلاسه کولو نه ده بريالۍ شوې خو د سرچينې په وينا هڅې يې پيل کړي او په دې برخه کې يې يو شمير افغانان مرسته کوي.
بلک واټر چې په افغانستان او عراق کې ښه مخینه نه لري او د عامو خلکو په زورونه، شکنجو، قتلونو او خپلسريو زندانونو تورنه کمپنۍ ده، څه موده مخکې داسې راپورونه ورکول شول چې د امريکا ولسمشر ټرمپ ته يې يوه طرحه لېږلې او له هغه غوښتنه شوې وه چې د افغانستان کانونه دې بلک واټر ته وسپارل شي چې دوی يې استخراج کړي.
پرنس په دغې طرحه کې ويلي و چې چين غواړي په افغانستان او سيمه کې اقتصادي نفوذ پراخ او د دغې هېواد کانونو راسپړلو اراده لري خو زياته کړې يې وه چې امريکا بايد له چين وړاندې د افغانستان کانونه استخراج کړي.
دغه راز سپوټنيک خبري اژانس په تېر دسمبر مياشت کې د پرنس له قوله ولیکل، چې دی غواړي د افغانستان جګړه په لاس کې واخلي او له دې لارې د هېواد د کانونو د استخراج چارې پيل کړي.
هغه طرحه چې د افغانستان په اړه د پرنس له لوري رسنيو ته رسېدلې وه، پکې راغلي و چې افغانستان له يو تريليون ډالرو د زياتو پيسو خوندي زيرمې او کانونه لري او دی چمتو دی چې د خپلې کمپنۍ د پوځي ځواک په مټ دغه زيرمې راوباسي.
تېر کال هم ايريک پرنس له امريکا څخه غوښتي و چې د افغانستان جګړه دې بلک واټر خصوصي کمپنۍ ته وسپاري.
په عين حال کې د روڼتيا څار بنسټ مسئولين، له افغان چارواکو سره په دې اړه د بلک واټر کمپنۍ د مشر ايريک پرنس خبرې تاييد کړي دي.
خو د کانونو او پطروليم وزارت د کانونو د ساتنې په برخه کې له يوه خصوصي امریکايي کمپنسۍ سره اړيکې ردوی او زياتوي چې بهرنيان او په ځانګړي ډول امريکايان د افغانستان د کانونو د استخراج په برخه کې دلچسپي لري او حکومت هم له دا ډول پانګونې هرکلی کوي.
بايد وويل شي، چې د بلک واټر امریکايي کمپنۍ د پخواني ولسمشر حامدکرزي د دورې پر مهال په افغانستان کې پوځي ماموريت کړی او په شخصي زندانونو کې يې ډیری افغانان شکنجه کړي، ترور کړي او وژلي دي.
