چارواکي: طالبانو د کندهار- روزګان پر لاره پوليس تښتولي
(کابل ټکی کام، ۱۳۹۶، کب ۹) سيمه ييز امنيتي مسئولين واي، چې طالبانو نن سهار له يوې نښتې وروسته د کندهار- روزګان پر لويه لاره نوولس پوليس تښتولي دي.
د کندهار امنيه قومندان جنرال رازق نن د چهارشنبې په ورځ رسنيوته وويل، طالبانو تېره ورځ د کندهار- روزګان پر لويه لاره د تالاشۍ پر مهال نوولس پوليس تښتولي چې څو تنه پکې مسافر هم دي.
جنرال رازق طلوع نيوز ته ويلي، دغه کسان د روزګان ولايت څخه کندهار ته پر لاره و چې د روزګان په چوره ولسوالۍ کې د طالبانو لاسته لوېدلي دي او له ځان سره يې بيولي دي.
نوموړی وايي، په دې کسانو کې پنځه پوليس د ميانشين ولسوالۍ او نور د روزګان اوسېدونکي دي زياتوي چې په دې اړه يې پلټنې پيل کړی تر څو دغه پوليس له طالبانو خوشې کړي.
په عين حال کې، د کندهار يوې امنیتي سرچينې ويلي چې طالبانو د ملي اردو ځواکونو يونيوروم په تن کړی و او لومړی يې په سيمه کې د پوليسو پر يوه پوسته بريد وکړ، پنځه پوليس ووژل شول او څلور نور زخميان شول او وروسته يې په لويه لاره د موټرو تلاشي پيل کړه يواځې هغه کسان يې له موټرو ښکته کول چې په پوليسو کې يې دندې لرلې.
طالبانو تر اوسه په دې اړه څه نه دي ويلي.
