(کابل ټکی کام ۱۳۹۶ کب ۱۹ فرید افغان)
د فراه د ولایتي شورا رئیس فرید بختور رسنیو ته ویلي؛ چې طالبانو د فراه د مرکز اړوند برنګتوت سیمه کې یوه پوسته نیولې او په خبره یې چې په دې برید کې ۶ پولیس وژل شوي او د هغوی ټول مهمات طالبانو له ځانه سره وړي.
طالبانو د پیښې د پخلي تر څنګ د یوه پولیس د نیولو ادعا هم کړې.
دا په داسې حال کې ده چې تر دې څو شیبې وړاندې طالبانو د بالابلوک ولسوالۍ ته تللي یو لوی ټولي کمانډو ځواکونو ته چې شمیر یې تر ۵۰ پورته و، مرګ ژوبله واړوله.
په لویدیځ زون کې د ملي اردو د ځواکونو ویاند نورالحق خالقي د ۳۰ کمانډوځواکونو وژل منلي او د ټپیانو اړوند یې له څه ویلو ډډه کړې.
د فراه د ولایتي شورا منشي عبدالصمد صالحي وایي، تلفات، ځکه واوښتل، چې په خپل وخت هوایي ملاتړ ساحې ته ونه رسیده
دا په داسې حال کې ده چې تیره ورځ د تخار ولایت خواجه غار ولسوالۍ په مربوطاتو کې هم طالبانو د ملي اردو یو مرکز او ۱۲ پوستې ونيولې او لسګونو اربکیانو او د ملي اردو ځواکونو ته یې مرګ ژوبله واړوله.
په ورته وخت کې د ملي یووالي د حکومت مشر اشرف غني ویلي؛ طالبان زموږ د ملي امنیتي ځواکونو سره د مخامخ جګړو توان نه لري.
طالبانو ویلي چې دوی هر ډول مخامخ جګړې ته چمتو دي او وړتیا یې لري.
