افغانستان کې د سړو سیمو د تعلمیي کال زنګ ووهل شو
(کابل ټکی کام، ۱۳۹۷، وری ۴) نن شنبه په افغانستان کې د سړو سيمو نوی تعليمي کال په رسمي توګه پيل شو.
د پوهنې وزارت مسئولین وايي، سږ کال به په ټول هېواد کې له يو ميلیون زياتو زده کوونکو ته د زدکړو لپاره امکانات برابر کړي.
د پوهنې وزارت د نشراتو رئيس کبير حقمل وايي، په نوي کال کې د درې سوو نويو ښوونځيو د جوړلو پلان لري او د شپږ سوو ښوونځيو ودانۍ به هم ورغول شي.
د حقمل په خبره، د پوهنې وزارت به سږ کال په دوو پړاوونو کې يوويشت زره ښوونکي په دندو وګماري.
پوهنې وزارت په داسې حال کې د نویو ښوونځيو د جوړولو خبر ورکوي چې تېره ورځ د هلمند ولايت د پوهنې رئيس داود شاه رسنيو ته وويل، چې د دغې ولايت له دېرشو ښوونځيو د ملي اردونو ځواکونه د سنګر په توګه استفاده کوي.
د دغې ولايت ښوونکي وايي، د امنيتي ځواکونو او طالبانو تر منځ د جګړو له امله ځينې ښوونځي ويجاړ شوي چې لاهم هم ويجاړ پراته دي او تر اوسه يې په بيارغونې هيڅ کار نه دی شوی.
