چارواکي: پاکستاني ځواکونو د کونړ پر خاوره د توپونو تازه بريدونه کړي
(کابل ټکی کام، ۱۳۹۷، وری ۷) د کونړ ولايت امنيتي چارواکي وايي، چې پاکستاني ځواکونو د کونړ پر خاوره تازه بريدونه کړي چې خلکو ته يې مالي زيانونه اړولي دي.
د کونړ د امنيې قومندانۍ وياند فريدالله دهقان وايي، د تېرو ۲۴ ساعتونو په موده کې د پاکستان له لوري د کنړ پر دانګام ولسوالۍ د توپونو ۱۱۲ مرمۍ لګېدلي دي.
د دهقان په خبره، په دې بريدونو کې تر اوسه چاته د ځاني زيان راپور نه دی ورکول شوی خو ځايي خلکو ته يې مالي تاوانونه اړولي دي.
چارواکي وايي، چې اوس هم په وقفه يي توګه د پاکستان له لوري د توغنديو ګولۍ لګېږي.
دا په داسې حال کې ده، چې تېره ورځ د افغانستان د بهرنيو چارو وزارت په يوې خبرپاڼې کې ويلي و چې اوس هم د ډيورنډ کرښې له هغې غاړې د کونړ پر خاوره د توغنديو بريدونه کېږي چې له کبله يې خلکو ته ځاني او مالي زيانونه اوښتې دي.
د بهرنيو چارو وزارت په خبرپاڼه کې راغلي، د افغانستان دولت او خلک د پاکستان دغه کړنه په کلکو ټکو غندي او دا يې د نړيوالو معيارونو خلاف عمل بللی دی.
بهرنيو چارو وزارت وايي، په دې اړه يې تېره ورځ په کابل کې د پاکستان سفارت شارژدافیر احضار کړی او له هغه يې غوښتي چې چارواکو ته پر کونړ د بریدونو راپور ورکړي ترڅو د توپونو ورولو دغه لړۍ په سمدستي توګه بنده کړي.
تر دې مخکې د افغانستان د دفاع وزارت ويلي و که د کرښې له هغې خوا د توپونو بريدونه وشي نو سرحدي ځواکونه اجازه لري چې بغير له امر اخيستلو متقابل ځواب ورکړي.
