داروزګان د پوهنې ریاست: په ښوونځیو کې میشتو امنیتي پوستو زرګونه ماشومان له زدکړو بې برخې کړي

(کابل ټکی کام ۱۳۹۷ وری ۷ فرید افغان)

له هلمند ولایت وروسته د اروزګان د پوهنې ریاست او ولسي خلکو هم پر حکومت غږ کړی چې د دوی ماشومان دې درسونو ته پریږدي او له ښوونځیو دې امنیتي پوستې وباسي.
دوی وایي؛ امنیتي ځواکونه له مکاتبو څخه د پوستو او پوځي مرکزونو کار اخلي او همدې وضعیت زرګونه شاګردان د علم او پوهې له نعمت څخه بې برخې کړي.
د دې ولایت د پوهنې رياست د تفتيش آمر نجيب الله کامران رسنیو ته ویلي؛ چې له اړوندو امنیتي ادارو څخه یې په ځلونو د دې ستونزې د حل غوښتنه کړې خو چا پام نه دی ورته کړی.
نوموړی وایي؛ نه یواځې پوستې هلته شتون لري بلکې د مکاتبو ټول درسي مواد او نور لوازم هم چور شوي او تر ډیره یې ودانۍ هم نړیدلې .
بل پلو د یاد ولایت د امنیت آمر عبدالقوي عمري هم مني چې امنیتي ځواکونو په یو شمیر ښوونځیو کې پوستې جوړې کړې خو زیاتوي چې طالبانو هم په ځینو مواردو کې له ښونځیو د سنګر کار اخیستی.
نوموړی وایی؛ چې د دې ولایت ټول ښوونځي به د امنیتي ځواکونو له شتون څخه خلاصوي او که کوم زورواکي ورسره نه منله هغه به اړوندو امنیتي ادارو ته ورپیژني.
دا یواځې اروزګان نه ده چې افغان ځواکونه د تعلیمي ادارو څخه د پوستو او نظامي مرکزونو کار اخلي ؛په زیاتو ولایاتو کې همدې ستونزې لسګونه زره ماشومان له زدکړو محرومه کړي چې ښه بیلګه یې د هلمند ولایت ده.
د دې ولایت د پوهنې چارواکي څو ورځې وړاندې رسنیو ته ویلي و، چې شاوخوا ۲۰ بابه ښوونځيو او لیسو کې د امنیتي ځواکونو پوستې میشت دي او چارواکي یې هم غوښتنو ته کوم مثبت ځواب نه ورکوي.