(کابل ټکی کام، ۱۳۹۷، وری ۸) د امريکا دفاع وزارت يا پنټاګان په يوه تازه خپاره کړي راپور کې ويلي، چې افغان حکومت د نظامي وسایطو په ساتنه کې بې پروايي کوي او ډيری ورکړل شوي وسایط له منځه تللي دي.
نړیوالې ټولنې په تیرو شپاړلسو کلونو کې افغان پوځ ته بیلابیل ډوله پوځي وسایط لکه، زرهي او عادي وسایط، د ماینونو شنډولو تخنیکي وسایل، کشفي، جنګي، هليکوپتر، سپکې او درنې وسلې او نور ډول ډول تجهيزات ورکړي دي.
خو پنټاګان وايي، د افغانستان د کورنيو چارو وزارت دغې مرسته شويو وسایطو ته هيڅ پاملرنه نه کوي او په سمه توګه په نظامي وسایطو څارنه نه لري.
د امريکا دفاع وزارت وايي، افغانستان سره د د درې ميليارده ډالرو په ارزښت د ۹۵ زره پوځي وسایطو مرسته شوې چې اوس مهال يې د بې غورۍ له امله ډيری له منځه تللي دي.
تر دې مخکې هم داسې راپورونه ورکول شوي و چې له دولتي امکاناتو او پوځي وسایطو يو شمير دولتي مسئولين او سوداګر شخصي استفاده کوي.
دغه راز څه موده مخکې د امريکا يوې ويب پاڼې تاسک اندپريوز د عراق په موصل ښار کې د هغه رينجر انځور خپور کړ او ادعا يې کوله چې د افغان پوځ دی خو عراقي ځواکونه ترې استفاده کوي.
د افغانستان دفاع وزارت هم تاييد کړه چې ښايي کوم چا د شخصي ګټو لپاره د افغانستان پوځي وسایط عراق ته استولي وي.
نړیوالې ټولنې له افغانستان سره ژمنه کړې، چې تر ۲۰۲۰ کال پورې به هر کال له افغان ځواکونو سره د څه باندې ۴ میلیارد ډالرو مرسته کوي.
د يادونې ده، چې د دولتي ځواکونو او طالبانو تر منځ په جګړو کې هم د افغان پوځ ډیری پوځي وسایط له منځه وړل کېږي يا د طالبانو لاسته لوېږي او وروسته طالبان له دغې وسایطو په خپلو بريدونو کې کار اخلي.
