(کابل ټکی کام، ۱۳۹۷، وری ۱۱) په فارياب ولايت کې سيمه ييزو پوليسو يو شمير مهمې ستراتيژيکې سيمې پرېښي او خپله مرکز ميمنې ته ستانه شوي دي.
د سپوږمۍ راډيو د راپور له مخې، سيمه ييزو پوليسو شپږ مهمې سيمې خوشي کړي چې د هغوی له تګ وروسته د طالبانو لاسته لوېدلي دي.
د دغې ولايت د ګرېزوان ولسوال ملا فیض الله وايي، د سيمه ييزو پوليسو (اربکيانو) قومندان عبدالمجید وکيل زاده د خواجه غار، یوخن، دره شاخ، تخاره، اب باریک او بهارک مهمې سيمې خوشې کړي او قومندان له افرادو سره د ميمنې ښار ته تللی دی.
د فیض الله په خبره، د يادو کليو په نيولو سره د ولسوالۍ مرکز ته هم جدي ګواښ پېښ دی او که مرسته ونه شي نو ښايي چې ولسوالۍ هم سقوط شي.
له بلې خوا د ولايتي شورا مرستيال صبغت الله سېلاب هم تاييدوي چې يادې سيمې د طالبانو لاسته لوېدلي اندېښنه کوي که حکومت د فارياب ولايت ته پاملرنه ونه کړي ښايي د ولايت مرکز هم په بشپړ ډول سقوط شي.
دا په داسې حال کې ده، چې تېره او وړمه ورځ د غور ولايت د چهارسدې ولسوالۍ د څوارلسو لويو کليو خلکو له طالبانو ملاتړ اعلان کړ چې طالبان وايي په يادو سيمو کې د حبيب الله، مولوي ګل محمد او ملاګل په نوم قومي مخورو ورته له پنځه نيم سوو زياتې سپکې او درنې وسلې او په زياته اندازه مهمات هم سپارلي دي.
