(کابل ټکی کام، ۱۳۹۷، وری ۲۹) ولسي جرګې پريکړه کړې چې د ملي امنيت عمومي رئیس معصوم ستانکزی يو ځل بيا د جرګې تالار ته ور وغواړي.
له تېرو درې اوونيو راهيسې د معصوم ستانکزي د استیضاح په اړه بحثونه کېدل.
د ولسي جرګې رئيس عبدالروف ابراهيمي وويل:”موږ د استيضاح د ورځې د معلومولو لپاره د راتلونکې دوشنبې او چهارشنبې په ورځو رأیګېري وکړه، ۷ سره کارتونه پورته شوي او څلور شنه کارتونه، د دوشنبې ورځې لپاره ۴ شنه کارتونه پورته شول او د چهارشنبې ورځې لپاره ۷ سره کارتونه چې په ټوله کې ۱۱ کارتونه کېږي،۵۰ جمع ۱ هم تکمیل او د استيضاح موضوع د چهارشنبې په اجنډا کې شامله شوه.”
په عين حال کې د ولسي جرګې غړو تر منځ په ننۍ غونډې کې د معصوم ستانکزي د استیضاح په اړه جنجالونه وشول او یو شمير وکيلانو يې د بيا ځل استیضاح غوښتنه کوله خو ځينو نورو بيا د جرګې د رئيسانو پريکړه د اصولو خلاف او غير قانوني کار وباله.
د ولسي جرګې غړي، عبیدالله بارکزي وويل: ولسي جرګې ته د هغه استیضاح کول غير قانوني دي او آن که وينه مې هم توی شي نو چاته به د معصوم ستانکزي د راغوښتلو اجازه ورنه کړم.
د جرګې يو شمير نورو غړو هم د نوموړي د استيضاح کولو سره مخالفت څرګند کړ او دا يې غير قانوني کار وبللو خو يو شمير نورو وکيلانو وويل چې امنيتي مسئولين په خپلو کارونو کې پاتې راغلي دي.
شاوخوا يوه اوونۍ مخکې هم ولسي جرګې په هېواد کې د ناامنیو د زیاتېدو له کبله د دفاع او کورنیو چارو وزیران او د ملي امنیت رئیس استجوابيه غونډې ته وربللي و.
