(کابل ټکی کام ۱۳۹۷ وری ۲۹)
د هلمند ولایت ځایي چارواکي وایي چې نن د دې ولایت د مرکز لښکرګاه اړوند دچارګل چار راهي سیمه کې د یو فیلډر موټر د چپه کیدو له امله ۱۰ کسان مړه او ژوبل شوي.
د دې ولايت د ترافيکو مدير سمونوال ميرزا خان روحاني رسنیو ته ویلي؛ چې پیښه نن ماسپیښین درۍ بجې رامنځته شوې چې پکې د یوې میرمنې په ګډون ۴ ماشومان وژل شوي او ۵ نور ټپیان دي.
خو په دې پیښه کې یوه ټپي د پژواک خبري اژانس ته د ۷ تنو ټپیانو او ۵ د وژلو پخلی کړی.
د بست روغتون ډاکټران د دوو ټپیانو روغتیایي حالت د اندیښنې وړ بللی.
بل پلو د بلخ مرکز مزارشریف ښار کې د یو بس موټر د چپه کیدو له امله دوه تنه وژل شوي او ۲۵ نور ټپیان دي.
د بلخ د امنیې قوماندانۍ ویاند شیرجان دراني رسنیو ته ویلي؛ بس موټر له کابل څخه بلخ ته پر لاره و ، چې د موټر چلونکي د سرعت او بې احتیاطي له امله موټر چپه شوی او مرګ ژوبله یې اړولې.
د مزارشریف د حوزوي روغتون مشر خواجه نور محمد فیض وایي؛ د ټپیانو له ډلې یې د دریو تنو حالت د اندیښنې وړ دی.
