(کابل ټکی کام ۱۳۹۷ غویی ۲)
له سختو اعتراضونو او نیوکو وروسته د ملي یووالي حکومت هوډ کړی چې د بامیانو ولایت ته د بریښنا رسولو ژمنې ته عملي رنګ ورکړي.
اشرف غني د هندي او چینایي قراردادیانو سره د بامیانو ولایت ته د بریښنا رسولو د دریو پروژو لاسلیک وکړ.
لومړۍ پروژه د بغلان له دوشي څخه تر بامیانو چې ۱۸۰ کیلو متره واټن لري د ۲۲۰ کیلو ولټ بریښنا د رسولو قرارداد و چې د ۴۳.۸ میلیون ډالرو په ارزښت منظور شو.
یاده پروژه به د ۳۰۰ میګاواټه بریښنا د ورکړې ظرفیت ولري.
بله پروژه د بامیانو د دشت اژدر په سیمه کې د یو سب استیشن جوړول و، چې د ۲۰ کیلو ولټ بریښنا د تولید او ۳۲ میګاواټه بریښنا د جوړولو ظرفیت لري د ۱۱.۶ میلیونه ډالرو په ارزښت منل شوې .
همداراز ارګ دغه ولایت ته د بریښنا رسولو یوه بله پروژه د ۲۴.۱ میلیون ډالرو په ارزښت منظوره کړې چې په لومړۍ مرحله کې به ۲۰ زرو ګډونوالو ته بریښنا رسوي او وروسته به دا کچه تر ۳۵۰ زره ګډونوالو ته لوړه شي.
باید وویل شي چې ارګ وروسته تر هغه د دې پروژو د پیل ژمنه کړې وه چې د بامیانو یو شمیر استازو د روښنایي غورځنګ او ځینو نورو نومونو لاندې د حکومت پرضد پراخې خونړۍ مظاهرې وکړې او د ترکمنستان د بریښنا دلیږد پروژه یې د بامیانو له مسیر څخه غوښته چې حکومت ورسره د دې غوښتنې څخه د تیریدو په شرط د پراخې بریښنا د ورکړې ژمنه کړې وه او اوس چې د ملي یووالي د حکومت بقا ته کم وخت پاتې، دې ژمنو عملي رنګ خپل کړ.
د حکومت سیاسي مخالف او د نوې ملي جبهې مشر انوارالحق احدي په دې آند دی چې د ملي یووالي د حکومت مشر پکتیا، خوست ته د سفرونو او له بامیانو سره د ژمنې څخه هدف په راتلونکو ټاکنو کې د ځان په لوري د خلکو د جلبولو په خاطر د یو ډول کمپیان هڅه ده چې ترسره کوي یې
