تبصره
د ټاکنو کمېسيون چې د نوم ليکنې په اړه په ولاياتو کې ټاکنيز مرکزونه اعلان کړل، د تېرو ټاکنو پايلو ته په کتو سره ولس نه غواړي چې په ټاکنو کې برخه واخلي. خو چې د ټاکنو د کمېسيون په وينا پېژندپاڼه لازمي وګڼل شوه، کابل ښاريان د پېژندپاڼو په مرکز ورمات شول.
د اشرف غني او هم د ټاکنو د کمېسيون لخوا له ولسه په ټاکنو کې د ګډون او د وسله والو طالبانو لخوا د نه ګډون غوښتنه وشوه. اما تېره ورځ په کابل ښار کې چاودنې د کابل ښاريان له خپله برخليکه خبر کړل او د ټاکنو په موخه یې د پېژندپاڼو فورمې په خپلو وينو سرې شوې.
د کابل ښار د شپږمې حوزې د چاودنې مسئوليت داعش ډلې په غاړه اخستې دى، چې د وروستيو راپورونو له مخې ٦٢ تنو ته یې د وژل شویو او ١٢٠ پورې یې د ټپيانو شمېر ورسېد.
په هر حال، هر افغان چې په هر نوم وژل کېږي، د افغانانو لپاره تاوان، بهرنيان او په ځانګړې توګه امريکا ترې ډېره ګټه پورته کوي. په افغانستان کې چې هره پېښه کېږي، تر شا یې يو هدف موجود وي. که بهرني پوځونه په افغانستان کې پاتې دي، او يا نور په يوه او بله بهانه بيا افغانستان ته رالېږل کېږي، ترشا هدفونه لري. خو، په افسوس، څومره افغانان چې په روانو جګړو کې په دغه ډول ووژل شول، افغانانو ترې کوم هدف لاس ته رانه ووړ.
د بهرنيو پوځونو په مقابل کې د ولس مقاومت او يا د حکومتي پوځونو لخوا د طالبانو (ولس) پرخلاف جنګېدل ښکاره هدفونه لري. خو دا چې د تيرې ورځې په چاودنه کې کوم افغانان ووژل شول، دا دهغو ټاکنو قرباني شول چې پايلې به یې بيا هم د تېر په څېر د امريکا لخوا اعلانېږي.
که د افغانانو په رايه حکومت جوړېدای او په نوم ليکنو يا ټاکنو کې افغانانو ځانونه وژلای، ګټه به هم افغانانو ترلاسه کوله. خو دا چې نوم ليکنو او ټاکنو کې افغانان ځانونه ووژني او بيا د واک انتخاب امريکا کوي، دې ته وايي.. ځانوژونکې ټاکني.
د سر په سترګو ګورو چې يو شمېر کسان د امريکا په لاس د جوړ شوي حکومت پلوي کوي او نور ټول ولس د بهرنيو پوځونو په مقابل کې د طالبانو (ولس) پلوي دي. خو ګټه هغه چا وکړه چې د ولس لپاره یې ځانونه قرباني کړل؛ د هغوی نومونه دتاريخ پاڼې خوندي ساتي. او هغه چې د امريکا له پلان سره سم د ټاکنو قرباني کېږي، د هغوی وژنه تاريخ له ځان سره نه ساتي او حکومت يوه لحظه هم پرې ماتم نه کوي.
د کابل له بريد وروسته به څرګنده شي چې حکومت په نوم ليکنه او ټاکنو کې امنيت ساتلای شي؟ نه هيڅکله نه. تراوسه یې چې تر يو لک زياتو بهرنيو پوځونو په موجوديت کې امن ونه ساته، وروسته له دې به یې څه وساتي. له خپل برخليکه ناخبره کسان د نوم ليکنې په موخه د پېژندپاڼو په اخیستلو کې ځانونه وژني، خو حکومت د امريکا لخوا جوړېږي.
اوس خو پوره جوته شوې شوه چې دا ټاکنې ځانوژونکي ټاکنې دي. تېره ورځ خو پکې په روحي او جسمي توګه افغانان ووژل شول، که د کابل په ښار يا د ولاياتو په مرکزونو کې په يوه او بل نامه رایې واخیستل شي او پايلې یې د امريکا په لاس اعلان شي، هغه وژنې به بيا د افغانانو لپار ذهني وژنې وي. د امريکا لخوا حکومت جوړول به د افغانانو روح او ذهن دواړه ووژني. هغه وژنې به له خپل برخليکه د ناخبرۍ وژنې وي. هغه وژنې به د راتلونکي نسل وژنې وي. هغه وژنې به د څو کسانو په رايه د ټول ولس وژنې وي. هغه اشخاص چې د پرديو د اهدافو لپار وژل کېږي، هغو وژنو ته ځانوژني ويل کېږي.. او دا ټاکنې به د افغان ولس برخليک ټاکونکې ټاکنې نه، بلکې ځانوژونکې ټاکنې وي.
