(کابل ټکی کام ۱۳۹۷ غویی ۴)
د فراه ولایت ځایي چارواکي وایي چې طالبانو تیره شپه د دې ولایت د بالابلوک ولسوالۍ اړوند د نهرک په سیمه کې پر یوې قرارګاه حمله کړې او ګڼو ځواکونو ته یې مرګ ژوبله اړولې.
د فراه د والي ویاند ناصر مهري وایي؛ په دې برید کې د عامه نظم ۵ سرتیري وژل شوي او ۲ تنه نور ټپیان دي.
نوموړی زیاتوي چې په ځوابي برید کې ۹ طالبانو ته هم مرګ ژوبله اوښتې.
خو د دې ولایت ولایتي شورا او دسیمې خلک بیا وایي چې د طالبانو په دغه تهاجمي حمله کې ۱۰ تنه د نظم عامه ځواکونه وژل شوي او یو شمیر نور ټپیان دي.
طالب ویاند قاري یوسف احمدي بیا په خپله ټویټر پاڼه خبر ورکړی چې په دې بربد کې یې ۱۷ تنه د نظم عامه ځواکونه وژلي او یوه لویه قرارګاه یې نیولې.
نوموړي ویلي چې په دې برید کې یې د دو عسکرو په ګډون ۲ هاموي ټانګونه او ۲۰میله سپکې او درنې وسلې او مهمات هم نیولي .
بالابلوک هغه ولسوالۍ ده چې څو اونۍ وړاندې دولتي ځواکونو د ناټو ځواکونو په ملاتړ هوایي او ځمکني عملیات پیل کړي و.په داسې حال کې چې د دې ولایت والي بصیرسالنګي د دې ولسوالۍ خلکو ته ګواښ کړی و، چې یا دې کورونه پریږدي او یادې د ناټو ځواکونو هوایي بریدونو ته ځان چمتو کړي.
