سخت دریزه هندوانو د عليګهړ په اسلامي پوهنتون هجوم وروړی
(کابل ټکی کام، ۱۳۹۷، غویی ۱۵) د ایرنا د خبر له مخې، سخت دريزه هندوانو د هند په اترپرديش ايالت کې په اسلامي پوهنتون هجوم وروړی او د دواړو غاړو تر منځ تاوتريخوالی رامنځته شوی دی.
د سرچينې په وينا، تاوتريخوالی وروسته له هغې رامنځته شو چې د (یووا واهيني) په نوم د هندو مذهبه يوې ډلې په ياد پوهنتون هجوم ور وړ او هڅه يې کوله چې د هند هېواد د پخواني مسلمان ولسمشر حمید انصاري د تقديرولو مراسم ګډوډ کړي.
د هندوانو دغې سخت دريزې ډلې ويلي، چې د دوی د برید او هجوم ور وړلو اصلي لامل په پوهنتون کې د پاکستان د جوړوونکي (محمد علي جناح) انځور دی چې له ۱۹۳۸م کال راهيسې تر دې دمه په پوهنتون کې راځړول شوی دی.
تاوتريخوالی وروسته له هغې زيات شو چې د پوهنتون محصلينو پوليسو ته مراجعه وکړه خو د پوليسو له لوري پرې ګازي مرمۍ وکارول شوې او هغوی يې تيت پرک کړل.
د پوهنتون محصلينو د هند د لومړي وزير نريندرا مودي ګوډاګي ته اور ورته کړ او پر هغه يې تور پورې کړ چې سخت دريزه سياست يې هندوان دې ته اړ کړي چې د مسلمانانو او هندوانو تر منځ تاوتريخوالی رامنځته شي.
ویل کېږي، د پوهنتون د محصلينو او هندوانو تر منځ د تاوتريخوالي پر مهال پر پوهنتون او د عليګهړ پر ښار د انټرنيټ سهولت پرې شوی و.
د يادونې ده، چې په هند کې د واکمن بهارتيا جنتا (بي جي پي) ګوند د واک تر لاسه کولو وروسته په دغې هېواد کې د مسلمانانو پر ضد تاوتريخوالی او حملې زياتې شوي چې تر دې دمه پکې لسګونه مسلمانان وژ شوي دي.
