پنټاګون: فراه زمونږ په مټو له سقوط نه وژغورل شوه
(کابل ټکی کام ۱۳۹۷ غویی ۲۹)
د امریکا د دفاع وزارت یا پنټاګون د افغان پوځ او پر وړاندې یې د طالبانو د وروستیو بریدونو په تړاو څرګندونې کړې او له سقوط څخه د فراه ړلایت ژغورل یې د امریکایي ځواکونو ابتکار بللی دی.
پنټاګون ویلي؛ د فراه ښار سقوط حتمي و، خو د دوی د مرستندوی ماموریت هوایي ځواکونه او د افغان ځواکونو مشاورین په سیمه کې و، چې د طالبانو له خوا د ولایت د سقوط خطر یې دفع کړ.
د پنټاګون ویاندې “دنا وایت“وایي د فراه تر سقوط وروسته مو د لومړي ځل لپاره د افغانستان شپږ واړو قول اردوګانو ته حکم کړی چې د مخالفینو د ممکنه حملو لپاره چمتو اوسي او له دفاعي حالت څخه، تعرضي حالت خپل کړي.
په فراه ښار کې د ملي اردو قوماندان ګدا محمد دوست بیا دا مني چې د قاطع ملاتړ ماموریت یې په سخت حالت کې مرسته وکړه خو زیاتوي چې موږ هڅه کوو د فراه د ښار ګرد چاپیره یو پراخ امنیتي کمربند ایجاد کړو، ترڅو مخالفین د بیا ځل لپاره ونه شي کړای د فراه ښار ته ننوځي.
نوموړي همداراز وویل؛ بهرنیو دوستانو ډاډ راکړی چې د دې ولایت په مختلفو ولسوالیو کې به د مخالفینو د ځپلو په موخه یو لړ تصفیوي عملیات ترسره کوي ترڅو مقابل لوری په مرکز د بریدونو شته ځواک له لاسه ورکړي.
باید وویل شي چې څو ورځې وړاندې طالبانو د فراه په مرکز برید وکړ چې د ملي امنیت د ریاست په ګډون یې ګڼ شمیر امنیتي پنډغالي ونیول ، خو تر ماښام وروسته په داسې حال کې چې سیمې ته هیڅ کومکي ځواکونه نه و، رسیدلي بیرته ترې په خپله خوښه ووتل.
یو شمیر کړیو په یاد برید کې د ګاونډي هیواد ایران د لاس لرلو ادعا وکړه خو د ملي دفاع وزیر طارق شاه بهرامي او د فراه والي بصیر سالنګي دا ادعا یواځې پروپاګند وباله او په سختو ټکو یې رد کړه.
