د لانګ وار ژورنال په نوم آنلاین امریکايي خپرونې د امریکا د دفاع وزارت د ویاندې د وروستیو څرګندونو په اړه تبصره کړې او د افغانستان د وضعیت په اړه یې د نوموړې څرګندونې له ”حقیقته لیرې“ بللې دي.
د پنټاګان ویاندې، ډانا وایټ، تېره پنجشنبه د امریکا په دفاع وزارت کې د خبري کنفرانس پر مهال د طالبانو د وروستیو پرمختګونو په اړه د یوې پوښتنې په ځواب کې وویل چې طالبان ”مایوس“ شوي دي. نوموړې زیاته کړه چې طالبانو کوم ”پرمختګ نه دی کړی“ او یواځې پر ”نرمو هدفونو“ بریدونه کوي.
د لانګ وار ژورنال خپرونې ایډېټر، بیل روګیو، لیکي ډانا وایټ داسې مهال د طالبانو د ”مایوسۍ“ په اړه خبرې کوي چې دا ډله تېره اونۍ د فراه ښار ته ننوتله او د هېواد په نورو برخو کې یې دوې ولسوالۍ له دولتي ځواکونو ونیولې.
د لانګ وار ژورنال په خبره، د وایټ څرګندونې د ۲۰۱۲ز کال سپتمبر میاشتې ته سړی ګرځوي، کله چې د امریکا د هغه وخت دفاع وزیر، لیون پنیتا، ادعا وکړه چې پر بهرنیو ځواکونو د افغان عسکرو نفوذي بریدونه د طالبانو د ”وروستیو سلګیو“ ښکارندويي کوي.
وایټ دوه اونۍ وړاندې هم دې ته ورته څرګندونې کړې وې او ویلي یې و چې طالبانو د ”مایوسۍ“ او د ”سیمو د بایللو“ له امله سرتېرو بریدونو ته مخه کړې ده.
خو لانګ وار ژورنال خپرونه وايي، د افغانستان د ولسوالیو د وضعیت په اړه د دوی سروې ښيي چې د افغانستان د ۴۰۷ ولسوالیو پر ۵۹٪ خاوره یا هم طالبان واکمن دي او یا نفوذ پرې لري. دا له ۲۰۰۱ز کال راهیسې د طالبانو د واک تر ټولو لوړه سلنه ده.
د پنجشنبې ورځې په خبري کنفرانس کې ډانا وایټ همداراز ویلي و چې د افغانستان د پوځ ټولې شپږ قول اردوګانې د طالبانو پر ضد په عملیاتو بوختې دي.
د افغان پوځ ټولې قول اردوګانې له اتو میاشتو راهیسې د تهاجمي عملیاتو پر ډګر ورننوتلې دي. اته میاشتې وړاندې، د ۲۰۱۷ز کال د اکتوبر پر ۳مه نېټه، د امریکا دفاع وزیر جیمز مټیس د امریکا د سنا مجلس د وسله والو خدمتونو کمېټې ته ویلي و چې ”د تیرې (سپتمبر ۲۰۱۷) میاشتې له پیل راهیسې، او په دې اوږده جګړه کې د لومړي ځل لپاره، د افغانستان د پوځ ټولې شپږ قول اردوګانې پر تهاجمي عملیاتو بوختې دي“.
خو لانګ وار ژورنال خپرونه وايي، ستونزه دا ده چې له اتو میاشتو راهیسې د افغانستان د اردو ټولې شپږ قول اردوګانې په تهاجمي عملیاتو بوختې دي، او بیا هم طالبان د پرمختګ په حال کې دي.
د لانګ وار ژورنال په خبره، د افغانستان پر نفوس د طالبانو کنټرول، د ملکي تلفاتو زیاتوالی، فرقوي بریدونه، امنیتي پیښې او د افغان ځواکونو د شمېر کمېدل د افغانستان د وضعیت په اړه د ډانا وایټ د ”خوشباوره ارزونې“ تکذیب کوي.
