د سعودي عربستان ولیعهد محمد بن سلمان نږدې له یوې میاشتې راهیسې د رسنیو پر مخ نه دی راښکاره شوی، چې له امله یې د نوموړي په اړه شکونه راپیدا شوي دي.
برتانوۍ ابرزرور ورځپاڼه وايي، محمد بن سلمان د تیرې اپرېل میاشتې له ۱۲مې نېټې راهیسې نه دی راښکاره شوی.
د تیرې اپرېل میاشتې پر ۲۱مه نېټه، د سعودي عربستان په الخزامي شاهي ماڼۍ کې د ډزو غږونه واورېدل شول.
که څه هم د سعودي عربستان دولتي خبري اژانس وویل چې دا ډزې امنیتي ځواکونو پر هغې کوچنۍ ډرون الوتکې کولې چې شاهي ماڼۍ ته رانږدې شوې وه، خو ځینو نورو ګومان کاوه چې په اصل کې دا د سعودي شهزادګانو له لوري پر محمد بن سلمان د کودتا هڅه وه.
د ورځپاڼې په خبره، د سعودي ځینې مخالف هېوادونه یقیني وو چې همداسې شوي دي.
تېره اونۍ د کیهان په نوم ایرانۍ ورځپاڼې، د یوه عرب هېواد د استخباراتي ادارې د یوه پټ راپور په استناد، خبر خپور کړ چې ولیعهد محمد بن سلمان په برید کې دوې مرمۍ لګېدلی دی، او ښايي وژل شوی وي.
د کیهان ورځپاڼې مسؤل مدیر حسین شریعتمداري ویلي، ”هغه پټ شواهد چې د محمد بن سلمان د ترور احتمال د یقین تر حده رسوي د یوه عربي هېواد د اطلاعاتي شبکو د یوه پټ خبر اړوند دي، چې کیهان ترلاسه کړي دي.“
د شریعتمداري په خبره، ”دې استخباراتي شبکې د خپل هېواد لوړپوړو چارواکو ته په پټ راپور کې په یقیني ډول ویلي چې د اپرېل پر ۲۱مه نېټه په ریاض کې د برید پر مهال محمد بن سلمان په دوو مرمیو لګېدلی دی، او دا احتمال هم شته چې نوموړی له دنیا تللی وي.“
کیهان ورځپاڼې په خپل راپور کې ویلي، ګڼ دلایل شته چې ښيي د محمد بن سلمان غیاب، چې نږدې یوه میاشت یې کېږي، د یوې داسې پیښې له امله رامنځته شوی چې د عامو خلکو له نظره پټه ساتله کېږي.
د دې ګنګوسې د اعتبار زیاتولو په موخه کیهان ورځپاڼې زیاته کړې، کله چې د اپرېل په وروستیو کې د امریکا د بهرنیو چارو وزیر، مایک پامپیو، ریاض ته په سفر تللی و، محمد بن سلمان یې په څنګ کې نه لیدل کېده، او یوازې د سعودي باچا سلمان بن عبدالعزیر او د بهرنیو چارو وزیر عدیل الجبیر ورسره ښکاره کېدل.
ایران او سعودي عربستان له زیاتې مودې راهیسې په منځني ختیځ کې د خپل نفوذ زیاتولو په موخه یو بل سره په رقابت بوخت دي.
د دې لپاره چې یادې ګنګوسې رد کړي، د سعودي شاهي کورنۍ د تیرې سه شنبې په ورځ یو انځور خپور کړ چې محمد بن سلمان د کابینې په یوه غونډه کې لیدل کېږي، او تایید یې کړه چې نوموړی ژوندی دی.
په همدې مهال، د مجتهد په نوم د سعودي د شاهي کورنۍ په اړه د پټو معلوماتو افشاکوونکي پر خپل ټویټر لیکلي چې د محمد بن سلمان د ټپي کېدو په اړه بحثونه زیات شوي دي.
مجتهد لیکلي ښايي محمد بن سلمان ډېر ژر د خپل ځان په اړه د ګنګوسو د رد په موخه له یوې رسنۍ سره خبرې وکړي.
