د سعودي عربستان الجوف سیمه کې د رسمي مناسباتو په ترڅ کې دوه قاضیان د سعودي شاهي او وطني سلام ته ونه دریدل، د دې جرم! لامله د قضاء د مجلس مشر دکتور ولید الصمعاني له لوري دواړه قاضیان تحقیق او پلټنو ته ولیږل شول.
د عدليې وزارت ویاند منصور القفاري په دې اړه وویل: د ملي او شاهي سلام د وړاندې کولو په مهال هغه ته احتراماُ دریدل سيمييز او نړیوال منل شوی دود دی، په دې سره هر هيوادوال خپل هیواد ته ژمنتیا او هغه سره مینه زباتوي.
د عدلیه وزارت ویاند زیاته کړه: په دې لړ کې مخالفت کوونکو سره هیڅکله نرمي نه شي کیدلی. په ځانګړې توګه د یوې رسمي اداري کارمند باید د دې رسمي دود هیڅکله مخالفت ونه کړي. او د دې دوو قاضیانو دا کار ناسم او د منلو نه دی.
داسې فکر کیږي چې د سعودي علماوو کې داسې ډېر کسان شته چې دا کار شرعاً ناسم ګڼي او دا دوه قاضیان هم د هغوی له جملې شمیرل کیږي، که څه هم ځیني یې د جواز قایل دي، خو موجوده وخت کې څرنګه چې د سعودي دولت په اصطلاح ځان د تجدد لور ته روان ښیي نو د جواز د پلويانو تله درنه او ځکه په رسمي توګه د دې دود مخالفت کوونکي تحقیق ته وړاندې کیږي.
