سرلیکنه
د وسله والو طالبانو مشرتابه نن په یوه رسمي اعلامیه کې خپلو ټولو جنګیالیو ته علني حکم وکړ چې د اختر په دریو ورځو کې دې خپل ټول تهاجمي حملات متوقف کړي، او مقابل لوری دې د تېر په څېر الٰهي خوښۍ لمانځنې ته ارام پرېږدي.
که څه هم طالبانو په تېرو ټولو اخترونو کې د نااعلان شوي اوربند له مخې پر دولتي مخالفینو له ممکنه بریدونو ډډه کوله، خو دا ځل یې د یاد اوربند اعلان د ارګ له لوري د اوربند تر اعلان وروسته راغلی.
د ارګ او طالبانو اوربند که له هرې زاویې وڅېړو، یو نېک اقدام او یوه ښه پیلامه ده.
د طالبانو په پیغام کې د مکث وړ څو نقطې:
طالبان داسې مهال په اختریزو خوښیو کې پر افغان دولتي کسانو د نه برید کولو اعلان کوي چې تر دې څو اونۍ وړاندې یې عملاً یادو دولت پلوه وګړو ته د عمومي عفوې مشرو ط اعلان کړی و. د طالبانو هغه اعلان ځکه بېساري و چې ټولو هغو مجرمینو ته هم عفوه پکې نغښتې وه چا چې د دولت او امریکایي ځواکونو تر سیوري لاندې پر افغان ولسونو د ستم بې رحمه مېچنې وڅرخولې.
که څه هم دولتي رسنیو هغه اعلان ته دومره پوښښ ور نه کړ، خو په عمل کې یې اثرات ډېر او د زیاتې وینې تویېدنې مخه په کې ونیول شوه.
د طالبانو په نوم د افغان ولس مبارزه له پیله د بهرني اشغال پر وړاندې ده، چا چې د افغانانو په مټ رغېدلی د عدالت سپېڅلی شرعي حکومت په ډېر بربریت سره را وپرزاوه.
د دې اشغال پر ضد د وسلوالې مبارزې له پیله، طالبان په حکومتي قواوو په هره اعلامیه کې غږ کوي چې د لوېدیځ د ستراتیژیکو موخو لپاره دې د خپلو وروڼو پر وړاندې جګړه نه کوي خو….
په اوربند کې دولتي ځواکونو ته ځانګړی امتیاز
طالبانو د اختر په ورځو کې د جګړو د اوربند سربېره ټولو سیاسي او نظامي دولت پلوه کسانو ته د دې اجازه ورکړې چې په ډاډ سره کولای شي په یادو محدودو ورځو کې د دوی تر واک لاندې سیمو ته د خپلو خپلوانو پوښتنې ته ورشي او له خپلو کلیوالو سره په ډاډه زړه اختریزې شېبې تیرې کړي. دا د طالبانو له خوا یو بل انعطاف و چې مقابل لوري ته یې د یوه امتیاز په توګه ډالۍ کړ.
بهرنیان له دې اوربنده مستثنا دي
طالبان چې له پیله خپل اصلي مقابل لوری امریکایي اشغالګر بولي او افغان ځواکونه د هغوی د مدافع ځواک په توګه پېژني او تل یې د هغوی له دفاع څخه راګرځوي، د اوربند په متن کې هم په ښکاره توګه د هغوی د هدف ګرځولو وړاندیز شوی.
د شنونکو په آند، که څه هم هغوی د ولسمشر غني له اوربنده ملاتړ ابلاغ کړی، خو د روانو ناخوالو سرچینه همدوی بلل کېږي چې په یوه او بله بهانه غواړي خپل نظامي شتون دلته لا پسې وغځوي.
د بندیانو خلاصون
طالبانو د ارګ د پیغام په مقابل کې خپل پیغام ته د بشري خواخوږي څه نور انعطافات هم ور زیات کړي. د بندیانو د دوسیو څېړل او د هغو بندیانو خوشي کول چې د کلک تضمین له مخې په ورکولو سره بیا نه غواړي د دولت لیکو ته ورشي .
د طالبانو دا ابتکار ښیي چې دوی په ټوله مانا ژمن دي چې له دښمن سره هم د بشري او اسلامي اصولو په رڼا کې چلند وکړي، هغه وړاندیز چې د ارګ په اعلامیه کې نه تر سترګو کېږي. په داسې حال کې چې د هیواد په مختلفو محابسو کې تر ۳۰ زره ډېر بېګناه افغانان د بند نامعلومې ورځې شپې له کوم برخلیک پرته تېروي.
طالبانو ویلي چې له دې فرمانه یواځې سیاسي بندیان (اردو، پولیس او د بېلابېلو حکومتي ادارو کارمندان) ګټه اخیستلای شي.
طالبانو د دې سربېره یادو بندیانوته د نورو سهولتونو او امتیازاتو د ورکړې ژمنه هم کړې او ویلي یې دي: ”د اسلامي امارت په بندیخانو کې چې څومره بندیان دي، هغه که جنایي وي که جنګي، د اختر په شپو ورځو کې دې مجاهدین د خوښیو سهولتونه، او د امکان په صورت کې له کورنیو سره د ملاقاتونو زمینه ورته مساعده کړي.“
طالب مشرانو له پوره ځراکت او ظرافته کار اخیستی او تېرو تجربو ته په کتلو سره یې د اوربند پر مهال د ملکي تلفاتو د مخنیوي غم هم خوړلی دی.
په داسې حال کې چې امریکا ویلي چې د اوربند پر مهال به د داعش او بهرنيو جنګیالیو پرضد عملیات لا څپڅپانده کړي، خو طالبانو، تېر ته په کتلو سره، چې د داعش په پلمه په ځلونو ولسي وګړي، طالبان او آن افغان ځواکونه په نښه شول، خپلو ټولو افرادو ته حکم کړی چې د ولسي خلکو په غونډو او د تجمع په ځایونو کې له ګډون کولو ډډه وکړي څو، د دوی په باور، ”زموږ ظالم دښمن په بهانه ګرزولو سره پر عام ولس ړندې بمبارۍ ونه کړي او د خلکو د تلفاتو سبب ونه ګرځي.“
په ټوله کې د طالبانو اعلان څو پیغامونه له ځانه سره درلودل:
- د هغه افغان ولس د ارادې تمثیل چې له لسیزو را په دېخوا په جګړو کې کړېږي او سوله ورته تر هرڅه لومړیتوب ښکاري
- د ټولنې تر ټول مظلوم قشر، چې بندیان دي، په اړه عادلانه پرېکړه او رښتینې ډیپلوماسي
- ټولو مخالفینو ته، که د لوړې کچې او د ټیټې رتبې کسان وي، په خپلو سیمو کې د اختریزو شېبو پر مهال د ډاډمن امن تضمین ورکول
- د اشغالګرو پر وړاندې منصفانه قضاوت او پر وړاندې یې د مبارزې د لا تشدید وړاندیز
او تر ټولو د خوښۍ ځای دا دی چې په کندهار او کابل کې یاد اوربند د خوښۍ په جشنونو ولمانځل شو.
د اوربند دا هرکلی او جشنونه ثابتوي چې د طالب اثر په نړیوالو او هېوادوالو ټولو مخالفينو خورا زيات دی. که مخالفين يي په هر نيت کوي، خو بيا هم د اسلامي امارت ته يو ځانګړی اثر ترې جوتېږي.
