(کابل ټکی کام ۱۳۹۷ غبرګولی ۲۱)
د ګډ حکومت چارواکي یوځل بیا له پاکستان سره پر دې سلا شوي چې د افغانستان ځینې ارتباطي افسران به د پاکستان په آی اس آی او د پاکستان ځينې ارتباطي افسران به د کابل په استخباراتي اداراتو کې وي تر څو د دواړو لوریو د ملي امنیت په تړاو ځینې محرم مالومات یو بل ته ورکړي.
د چین شینهوا خبري اژانس د خبر تر مخه، د دواړو حکومتونو چارواکو وروستۍ مخفي ناسته د پاکستان په راولپنډۍ ښار کې تر سره کړې او بر یاده جنجالي مسئله یې یوځل ییا تړون لاسلیک کړی دی.
د دې هوکړه لیک تر مخه؛ دواړه لوري به یو بل ته د پولې په دواړو غاړو کې د وسلوالو د فعالیتونو، د ممکنه بریدونو، ، د وسلوالو ډلو د تګ راتګ او نورو تحرکاتو په هکله خپلمنځي معلومات ورکوي.
د دې تړون هوکړه څوکاله وړاندې ډاکټر غني د پاکستان د پوځ له مشر سره منلې وه چې بیا د سختو اعتراضاتو له امله وځنډول شوه.
دا راپور داسې مهال مخته راځي چې ټاکل شوې ده سبا د پاکستاني پوځ مشر قمر جاوید باجوه د اشرف غني په بلنه کابل ته راشي.
د مشرانو جرګې غړي وایي؛ افغان چارواکي یواځې هغه څه تر سره کوي چې امریکایي سفارت یې ورته لارښوونه وکړي او پاکستان ته د افغان چارواکو وروستی سفر هم د امریکایانو په ځانګړې غوښتنه تر سره شوی.
د سیاسي چارو کارپوهان په دې آند دي چې د ګډحکومت چارواکو پاکستان ته دومره امتیازات ورکړل چې هیڅ حکومت نه دي ورکړي چې د ډیورند په کرښه د اغزن تار تیرول، د فاټا پر تړون چوپتیا، د ډیورند د کرښې د رسمیت پیژندلو ګنګوسې، د استخباراتي معلوماتو شریکول او ګڼ نور امتیازات چې له امله یې ډېرې بریا ته نږدې پروسې هن له ماتې سره مخ شوې.
