(کابل ټکی کام، ۱۳۹۷، غبرګولی ۲۹) تېره شپه طالبانو د کندوز ولايت په دشت ارچي ولسوالۍ کې د دولتي ځواکونو په پوستو بريدونه کړي او هغوی ته يې درنه مرګ ژوبله اړولې ده.
د دشت ارچي ولايت ځايي سرچينې وايي، طالبانو په دغه بريدونو کې له هغو ټانګونو استفاده کړې چې په جګړو کې له امنيتي ځواکونو نيول شوي.
سرچينه زياتوي، طالبان حکومتي سيمو ته په ټانګونو کې داخل شوي و او د هغوی نظامي لباس يې په تن و او په سيمه کې په پرتو پوستو يې له نږدې بريدونه پيل کړل.
د کندوز امنيتي مسئولين وايي، د تيرې شپې په بريد کې لس عسکر وژل شوي، له لسو زيات ټپيان دي او د هغوی وسلې او مهمات طالبانو له ځان سره وړي دي.
طالبانو د بريد مسئوليت منلی وياند يې ذبيح الله مجاهد په خپله رسمي ټویټر پاڼه ليکلي: د يادې ولسوالۍ مربوط د اديسي په سيمه کې يې دوه پوستې نيولي او پکې ميشت نوولس عسکر او سيمه ييز پوليس وژل شوي، يوولس تنه نور ټپيان دي.
د مجاهد په خبره، په برید کې يو ټانګ، يو توپ او په زياته اندازه سپکه او درنه وسله او مهمات د طالبانو لاسته لوېدلي دي.
