سرليکنه
امريکا په افغانستان کې په تېرو ١٧ کلونو کې پر افغان بې ګناه او بې دفاع ولس د ظلم او وحشت سرچپه مېچنې وګرځولې. د هر ډول سپکو او درنو وسلو ازموينه يې پرې وکړه، هر ډول پوځونه يې په افغانستان کې وازمويل او پر افغان ولس یې په هیڅ ډول بمباريو صرفه ونه کړه. بيا هم په ډېره سپين سترګۍ سره وايي چې په افغانستان کې سوله غواړو، طالبان بايد له افغان حکومت سره سوله وکړي.
درې مياشتې دمخه، ټرمپ سپينه ماڼۍ کې يوې غونډې ته ويلي و چې پر طالبانو به جنګي فشار راوړي څو سولې ته غاړه کښېږدي.
خو ټرمپ چې په کابل او ولاياتو کې د طالبانو لخوا پرلپسې مرګوني بريدونه وليدل، هغه کړې وينا ترې له ياده ووتله او بې له ځنډه یې دفاع وزارت ته په افغانستان کې د خپلو پوځونو د قوماندان نیکولسن د ګوښه کېدا امر ورکړ.
افغان ولس د امريکا تر اشغال دمخه، د روسانو په سلګونه پلانونه د هغوی له ذهنه په خپلو کاميابو بريدونو ایستلي وو. روسانو په افغانستان کې د جګړې لپاره ترسيم کړې خريطې له ځان سره خاورو ته يووړې.
افغان مجاهد ولس امريکايي جنرالان هم د روسانو په برخليک اخته کړل. د ترمپ لخوا د جنوبي اسيا لپاره نوې پاليسي او په افغانستان کې پر طالبانو د جګړې له لارې د فشار راوړلو ارمان به هم، ښايي، له ځان سره ګور ته يوسي.
امريکايي چاروکي نړيوالو ته څرګندوي چې دوی په افغانستان کې امن او سوله غواړي، خو پوځي جنرالان یې چې په پنټاګان کې په افغانستان کې د ورسپارل شوې دندې مياشتنی راپور وړاندې کوي، يواځې او يواځې پر افغان ولس د شپنيو عملياتو او هوايي بمباريو شميره مخې ته کښېږدي او له شپنيو عملياتو او هوايي بمباره پرته ورسره نور څه نه وي چې د پنټاګان غونډې ته یې وړاندې کړي.
تېره ورځ په افغانستان کې د امریکا د هوایي قواوو مرستیال، قوماندان جنرال لینس بنچ، په پنټاگان کې یوې خبري غونډې ته په افغانستان کې د خپلو کړنو او معلوماتو په اړه وويل: د کمکي اختر په ورځو کې تر اوربنده دمخه مو په داسې حال کې چې افغان پوځونه هم په جګړه کې راسره شريک وو، پر وسله والو طالبانو ١٥۴ بریدونه کړې او د طالبانو ١٩ مهم مرکزونه مو ويجاړ کړي دي.
په پنټاګان کې د جنرال بنچ له ويناوو داسې بريښي چې هغه په افغانستان کې د کاغذي سولې لپاره يوه برخه جګړه او درې برخې تبليغات کوي څو افغان ولس، طالبانو او نړيوالو ته وښيي چې موږ پر طالبانو د هر ډول فشار راوستلو توان لرو.
خو طالبانو د جنرال بنچ ادعا هم رد کړې ده. د سياسي چارو شنونکي د جنرال بنچ راپور ته په افغانستان کې د خيالي پوليسو د تشکيل په سترګه ګوري، چې پنټاګان ته خيالي راپورونه وړاندې کوي.
جنرال بنچ د پنټاګان په خبري غونډه کې د ټرمپ لخوا د جنوبي اسیا لپاره د نوې تگلارې ستاینه وکړه او د غونډې برخه والو ته یې څرګنده کړه چې موږ پر طالبانو ١٥٤ بريدونه د ټرمپ د هغې تګلارې پر اساس کړي دي چې پر افغان ولس یې د بمباريو واک راکړی دی.
جنرال بنچ چې په افغانستان کې د ټرمپ د نوې تګلارې له مخې پر طالبانو د ١٥٤ بريدونو يادونه کوي، بيا نو د امريکا کاغذي سولې ته څه اړتيا ده چې افغان حکومت یې د ماشومانو په څېر د (مم) په تمه ساتي.
افغان ولس د تېرو اشغالګرو، تېرو نظامونو بمباريو او کاغذي سولې ته په خپل افغاني غيرت او پولادي همت ځوابونه ورکړي دي. دا ډول به یې د ټرمپ د نوې تګلارې په مقابل کې هم وکړي او د دې کاغذې سولې په نامه د روانې اوږدمهالې جګړې پلان به ټرمپ، مشاورين، متحدين يې، استخبارات او جنرالان یې له ځان سره خاورو ته يوسي.
