نعمان لطیف
د امریکا سنا مجلس په افغانستان کې د مېشتو یرغلگرو پوځیانو د مشري لپاره د سکاټ مېلر تقرري ومنله.
۴۷ کلن سکاټ مېلر تر دې وړاندې په بوسنیا او جنوبي کوریا کې دنده ترسره کړې ده او په عراق کې د سپېشل فورس قومندان پاته شوی دی.
سکاټ مېلر سنا ته په وینا کې منلې چې په افغانستان کې د بري ضمانت نشي ورکولای، اما د جگړې د ختمولو لپاره یې شنه سیگنالونه لېدلي دي او خوشباوره دی چې افغان جگړه به زر مهار کړي.
سکاټ مېلر افغانستان ته د صلیبي لښکر ۱۷م جنرال دی. تر ده وړاندې ۱۶ جنرالان شرمساره شوې دي، په پیل کې ټولو لاپې ویشتي دي او په پای کې هر یو خړ مخ، خړې سترگې او ناکامه تللی دی.
سکاټ مېلر داسې وخت کې راځي چې جگړه تر پخوا تېزه شوې ده، طالبان تر پخوا غښتلي شوي او د جگړې ستراتېژي یې بدله کړې ده.
په داسې سختو او حساسو حالاتو کې سکاټ مېلر څه ته خوشباوره دی چې په مټ یې بایللې جگړه گټلای شي؟
په اوس کې دوه داسې پروژې دلته په لاره اچول شوې دي، چې له سپینو شعارو تورې گټې پورته کوي، ښایي د سکاټ مېلر د خوشباوري لامل همدا دوه پروژې وي.
بلې! مات شویو صلیبیانو په هر زمان کې بایللې جگړې په غولونکیو پروژو گټلې دي.
تاریخ مطالعه غواړي او له تاریخ درس اخېستل پکار دی؛ که د تېر تاریخ پاڼې واړو، وبه وینو چې موږ مسلمانان هلته مات شوي یو چېرې چې موږ سوله کړې ده او هلته مو بریا ترلاسه کړې ده چېرې چې موږ ددښمن هره نعره غولونکې بللې ده او د تورو په شرنگ او شرونگ کې مو خپ کړې ده.
افراط نه کوو، نه سولې ته سپک گورو او نه له سولې شاه اړوو. موږ پاکه او سپینه سوله غواړو او داسې سوله غواړو چې تمام اسلامي او ملي ارزښتونه مو په کې خوندي وي.
موږ ته د څو پروژیانو د پښو تر تڼاکو اسلامي او ملي ارزښتونه زیات محترم او معتبر دي.
د اوولس کلن یرغل موده کې موږ داسې ځوانان ولېدل چې په ورځو ورځو نهر گرځېدلي دي، پښې به یې دومره پړسېدلې وې چې بوټونه به ترې نه وتل، لوږې او تندې به دومره ځپلي و چې تالو به یې سره ورغلی و او خبرې به یې حلق کې وچې وې، خو که نن هم د اسلامي او ملي ارزښت خبره شي او د جگړې ثمر تر لاسه کیږي، په پوره باور سره وایم چې تر ټولو لومړی به همهغه ځوانان سولې ته چمتووالی ښکاره کوي.
سکاټ مېلر همدې ته خوشباوره دی چې د سولې له نوم به استفاده کوي او افغان ملت به په غولونکیو او غوړو خبرو تېر باسي. ترڅو په بایللې جگړه کې د گټې امید زیات کاندي، خو اوس ملت بیداره دی او په تشو خبرو نه تېر وځي او باور لري چې د جگړې عمده عامل د یرغلگرو شتون دی.
په دوهم قدم کې به د مېلر ټول تمرکز په داعشي پروژه وي، داعش په عراق کې ازمېښتي بڼه درلودله او له داعشي پروژې غربیانو دوه ډوله اهداف درلودل
۱ـ د تنظیمونو تعدد
د تنظیمونو تعدد د مسلمانانو تر منځ نفاق ښېندي او یو متفق دريځ یې په بېلا بېلو درېځونو ویشي، چې په وروسته کې دا تفرقه د ناکامي سبب گرځي.
۲ـ له عراق د القاعده تصفیه
القاعده د عراق لاسپوڅي رژیم ته د همېش لپاره د خطر زنگ و او امریکایانو غوښتل عراق له القاعدې تصفیه کړي.
که څه هم د القاعده رهبري شوری دریځ اسلامي و، د تنظیمونو له تعدد یې ځان وژغوره او له عراق سوریا ته ټول شوه، خو د داعش پر وړاندې د سنگر ایله کول یې ناکامه پرېکړه وه.
نن داعشي ټوپکمار د پلان سره سم له عراق کوچېدلي او له بده مرغه عراق له مجاهدینو په پوره توگه تصفیه دی.
افغانستان کې د داعش جوړښت، کمپاین او له عربي هېوادونه د داعشي ټوپکمارو راوستل د سکاټ مېلر د خوشباوري دوهمه نکته ده.
د سکاټ مېلر ټول تمرکز به په سازشي پروژو وي. د داعش اکمال، د پرلت پس پرده حمایت او د طالبانو په لیکو کې په مختلفو حېلو او تبلیغاتو د تفرقې کوښښ، درواغجن تبلیغات، د عام المنفعه تاسیساتو ویجاړول او د عامه وگړو وژل به یې محوري نکتې وي.
څه موده به زور ووهي، سازشونه به جاري وساتي او په جگړه سربېره اضافي مصارف به وکړي، خو موږ د خپل څښتن متعال په وعدو له حده زیات باوري یو، د دوی ټول مکرونه به له منځه وړي، ډېر به یې نطفه کې خنثا کوي، په ډېرو به ډېر ژر د ملت ذهن ورخلاصوي او په پای کې مطمئن یو چې بری د حق دی او حق د مؤمنانو سره دی.
[box type=”warning” align=”aligncenter” class=”” width=””]*یادونه: دا لیکنه د لیکوال خپل نظر دی، د کابل.کام د نظر ښکاروندويي نه کوي.[/box]
