واحد فقیري
ورځني سیاسي نوټونه (۱۱۹):
جمهورریس اشرف غني پرون (د جون پر اوله) ننګرهار ته تللی وو، او هلته ئې د خپل بیان په ترڅ کي څو ښکرور درواغ وویل. هغه وویل چي په دوو کالو کي به ۶۰۰۰ (شپږ زره) مکتبونه جوړ کړي. د دې شپږ زرو مکتبونو لپاره ئې ۲۵ مختلفي نقشې جوړي کړي چي د محیطي شرایطو سره مطابقت کوي. اشرف غني زیاته کړه چي که د پخوا غوندي معطل سوي وای، د دې مکتبونو جوړولو به ۴۰ کاله وخت نیولی وای. ښاغلي اشرف غني دغه راز ځیني نوري لاپي شاپي هم ووهلې چي واقعا د افغانانو عقل ته څرګند اهانت وو.
ځکه کله چي تاسو ۶۰۰۰ پر دوو کالو باندي تقسیم کړئ، هره ورځ باید ۸،۲ مکتبونه جوړ سي. اوس نو دا کوم سلیم عقل مني چي افغانستان د دې اقتصادي قدرت لري چي هره ورځ اته مکتبه جوړ کړي؟ ایا د شپږ زرو مکتبونو لپاره معلمان سته؟ ایا افغانستان په دوو کالو کي شپږ زرو مکتبونو ته اړتیا لري؟
د اسلامي عالم ستر سیاسي متفکر ابن خلدون په خپل تلپاته اثر المقدمه کي لیکي: د یوه ښه مشر اصلي خصوصیت دا وي چي خدعه او فریب نه کوي. پر خپلو وعدو باندي وفا کوي. ښه مامورین ټاکي، او کار اهل کار ته سپاري. ابن خلدون دغه راز د یو مسلمان سیاسي مشر لپاره څلور عمده شرایط او وړتیاوي یادوي. هغه لیکي: اول، یو مسلمان سیاسي مشر باید په اسلامي احکامو باندي پوه وي. دوهم، ایمانداره او صادق وي. درېیم، باید باکفایته وي. لټ او بېکاره نه وي. او بالاخره څلرم، صحت ئې سم وي. مریض نه وي. عصبي او لیونی نه وي. دماغي مشکلات و نه لري.
ابن خلدون بل ځای په المقدمه کي لیکي: اسلام مسلمانانو ته د ظالمو، فاسدو، او درواغجنو حاکمانو پر ضد د انقلاب او قیام امر کوي.
اوس نو، که چیري د ابن خلدون همدا جاویدانه سپارښتونه او خبري د اشرف غني له اظهاراتو سره مقایسه کړو، اشرف غني کاملا د ابن خلدون په مخالف قطب کي روان دئ.
یوه بله مهمه خبره دا ده چي اشرف غني پدې راز اظهاراتو سره د افغان ولس عقل ته سپکاوی کوي. ځکه اشرف غني پدې باور دئ چي افغانانو ته چي هر څه ووايي، هغوی ئې پرته له منطق او استدلال څخه مني. اشرف غني خپلو خلګو ته د ماشومانو په سترګه ګوري، د هغوی عقل او منطق ته احترام نه کوي، او پر عامو خلګو باندي د پسونو خیال کوي.
اشرف غني یو کرت ویلي ول چي دی به هر معلم ته یوه نمره مځکه ورکړي! په افغانستان کي به شل د اوبو بندونه جوړ کړي! په زرهاوو میګاواټه برق به تولید کړي. د کابل بانک غله به عدالت ته وسپاري! لنډه دا چي هغه دونه دوراغجني ژمني کړي دي چي یادول ئې عبث کار دئ.
مګر د تاسف ځای دا دئ چي د اشرف غني د ښکر ورو درواغو په مقابل کي افغان ولس چوپ پاته دئ. ندرتا افغانانو هغه په عام محضر کي چلنج کړی دئ. ابن خلدون یو ځای وايي چي الله پاک پر یو قوم باندي داسي حاکمان مقرره کوي چي د هغوی وړ وي.
______
واحد فقیري په کال ۱۹۶۲ کي په کندهار کي زېږېدلی دی. په کال ۱۹۸۰ کې د کندهار د احمد شاه بابا له لېسې څخه فارغ شوی دی. عالي تحصیلات یې په متحده ایالاتو کي کړي دي، او د امریکن پوهنتون او جورج مېسن پوهنتون څخه په سیاسي علومو کي درې ډیګرۍ لري. څو کاله یې د امریکا ږغ سره د خبریال په توګه کار کړی دی. څو کاله یې د پښتو د ژبي په برخه کي استادي کړې ده. درې کتابونه یې په پښتو ترجمه کړي دي. اوس د څو راډیوګانو او تیلویزیونو سره د سیاسي مبصر په توګه همکاري کوي. او وخت نا وخت یې سیاسي تبصرې د افغانانو په مختلفو ویب سایټونو کي خپرېږي.
