کابل.کام – د وږي ۱۱مه، ۱۳۹۷:
په افغانستان کې د بهرنیو ځواکونو عمومي قومندان، جنرال جان نیکولسن، چې نن (د وږي ۱۱مه / سپټمبر ۲مه) یې خپل ځای جنرال آسټين سکاټ میلر ته پرېښود، تېره ورځ په جوزجان کې د داعش پر ضد د طالبانو بریالي عملیات ځان ته منسوب کړي او ویلي یې دي چې په جوزجان کې د داعش ډلې جنګیالي افغان ځانګړو ځواکونو او امریکايي سرتېرو مات کړل. تر جنرال نیکولسن وړاندې، افغان دفاع وزارت هم دا عملیات خپله بریا بللې وه.
جنرال نیکولسن دا څرګندونې امریکا غږ ته په یوه لېږل شوي ایمېل کې کړې دي.
د نوموړي پرونۍ څرګندونې زیاتره د روسیې له لوري پر امریکا له داعش سره د ”مرستې“ د لګولو شویو تورونو په اړه وې. جنرال نیکولسن د خپلو څرګندونو په دوام کې ویلي، ”په داسې حال کې چې روسیه په افغانستان کې د داعش ډلې په اړه پرلپسې غلطې څرګندونې کوي، د امریکا متحده ایالاتو او افغان ځانګړو ځواکونو په جوزجان کې د اسلامي دولت – خراسان محاصره [جنګیالي] له منځه یووړل او په ننګرهار کې د اسلامي دولت – خراسان مشران او جنګیالي وژني.“
د روان ۱۳۹۷ز کال د زمري په ۹مه (۳۱ جولای) طالبانو تر ۲۴ ورځینو عملیاتو وروسته د جوزجان په درزاب ولسوالۍ کې د داعش ډلې سلګونو جنګیالیو ته ماتې ورکړه، او په دې توګه یې د هېواد شمال له دې ډلې پاک کړ.
په دې عملیاتو کې لسګونه داعش جنګیالي ټپیان او ووژل شول، د داعش ډلې د ځینو بهرنیو جنګیالیو په ګډون شاوخوا ۱۳۰ جنګیالي طالبانو ژوندي ونیول، او څه باندې ۲۵۰ نور داعشیان دولتي چورلکو له طالبانو وژغورل.
• جوزجان کې داعش څنګه مات شو؟ د طالبانو له ویاند سره مرکه
په ژغورل شویو داعش جنګیالیو کې د جوزجان لپاره د دې ډلې مشر، حبیب الرحمن رهبر، او د هغه مرستیال، مفتي نعمت، هم ګډون درلود. د عملیاتو تر پای ته رسېدو څو ورځې وروسته، امریکایۍ نیویارک ټایمز ورځپاڼې په خپل راپور کې وویل چې حکومت د داعش ډلې ژغورل شوي داعشیان د ”عزتمنو مېلمنو“ په توګه ساتي او په مېلمستونونو کې یې مېشت کړي دي.
په دې عملیاتو کې، افغان او امریکايي ځواکونو یوازې د داعش جنګیالیو په ژغورلو کې برخه درلوده، او الوتکو د عملیاتو پر مهال لږ تر لږه دوه ځله پر طالبانو بمبار وکړ.
جنرال نیکولسن تر دندې سپارلو یوه ورځ مخکې، له امریکا غږ سره په خبرو کې روسیه په افغانستان کې د امریکا په ناکامه ښوولو هم تورنه کړه. نوموړي ویلي، ”مونږ پوهېږو چې روسیه غواړي زموږ پوځي بریاوې او په افغانستان کې له کلونو راهیسې [زموږ ترلاسه کړي] پوځي پرمختګونه کم وښيي، او [زموږ شریکان] د د افغانستان د ثبات په اړه پوښتنې کولو ته مجبوره کړي.“
• د داعش تسلیم شوي مرستیال مفتي نعمت له حکومته ګیله کړې
د نوموړي په خبره، ”دا کومه پټه خبره نه ده چې روسیه داسې فرصت غواړي چې په وسیله یې د امریکا او د افغانستان په ګډون په منځنۍ اسیا کې زموږ د نورو شریکانو تر منځ فاصله راوړلي.“
له داعش سره ”د امریکا او افغان حکومت کومک“
روسیه پر امریکا او افغان حکومت تور لګوي چې بې نومه چورلکې یې د داعش ډلې جنګیالیو ته وسلې او نورې مرستې رسوي. خو امریکا او افغان حکومت دا تورونه ردوي او، په بدل کې یې، پر روسیې تور پورې کوي چې له طالبانو سره د وسلو مرستې کوي. خو روسیې هم تل دا تورونه رد کړي، او وايي چې له طالبانو سره یوازې سیاسي تماس لري. طالبانو هم د روسیې په ګډون له ګڼو نورو هېوادونو سره د تماسونو درلودل تایید کړي دي.
په داعش پسې.. تر جوزجان وروسته ننګرهار
په جوزجان کې داعش ډلې ته تر ماتې ورکولو وروسته، طالبانو د هېواد په ختیځ ننګرهار ولایت کې، چې په ځینو ولسوالیو کې یې داعش ډله شتون لري، د دې ډلې پر ضد عملیات پیل کړي دي.
طالبان او د سیمې ځایي اوسېدونکي وايي چې الوتکې د عملیاتو پر مهال له داعش سره پر جنګېدونکو طالبانو هوايي بریدونه کوي، چې له امله یې طالبان د داعش پر ضد عملیاتو ته دوام نشي ورکولای.
تر دې وړاندې هم طالبانو په ننګرهار کې د داعش ډلې د له منځه وړلو په موخه عملیات ترسره کړي وو، خو د الوتکو د بمبار او نورو ستونزو له امله یې بېرته ودرول. داسې ښکاري چې طالبان په ننګرهار کې د داعش پر ضد په عملیاتو ترسره کولو سره غواړي چې ټول افغانستان د دې ډلې له شتون څخه پاک کړي.
