(کابل ټکی کام، ۱۳۹۷، لړم ۵)
د ميدان وردګو ولايت په مرکز ميدان ښار کې د پوليسو پر یوه نظامي مرکز موټربم بريد درنه مرګ ژوبله اړولې ده.
د ميدان وردګو د ولايتي شورا غړی شريف هوتک وايي، دغه موټربم بريد نن اته بجې شاوخوا د سرتيري بريد کوونکي له خوا شوی چې په موټر کې يې چاودېدونکي توکي ځای پر ځای کړي او د کورنيو چارو وزازت د يوه نظامي مرکز مخې ته يې چاودنه ورکړې ده.
ويل کېږي، چاودنه هغه مهال شوې کله چې ياد مرکز ته کارکوونکي د خپلو دندو لپاره راتله.
د دغه ولايت د امنيې قوماندانۍ وياند حکمت الله درانی وايي، په بريد کې پنځه تنه وژل شوي او دولس تنه نور ټپيان دي.
سيمې ته نږدې سرچينې وايي، ټوله مرګ ژوبله د ياد پوځي مرکز پرسونل او نظامي کارمندانو ته اوښتې ده.
د بريد مسئوليت طالبانو منلی او وياند يې ذبيح الله مجاهد په خپله رسمي ټويټرپاڼه لیکلي، په ميدان ښار کې په یوه لويه مهمه قرارګاه بريد د يوه سرتيري بريد له لوري شوی چې له امله يې لسګونه افسران او عسکر وژل شوي، خورا ډير وسايط له منځه تللي دي.
مجاهد زياتوي، د ياد بريد نور جزيات به وروسته له رسنيو سره شريک کړي.
