(کابل ټکی کام، ۱۳۹۷، لړم ۶)
د افغانستان د نشه يي توکو سره د مبارزې وزارت وايي، چې په افغانستان کې او په ځانګړي توګه په محصلينو کې د اعتیاد کچه زياته شوې ده.
د دغه وزارت د نشه يي موادو سره د غوښتنې راکمولو رئيس ناصر شريفي وايي، د نشې ګولۍ په اسانه پيدا کيږي او د پوهنتون ډيری محصلين په دغه ګوليو روږدي شوي زياتوي چې دغه ځوانان د امتحانونو په شپو کې د يادو ګوليو استعمال ځکه ډير کوي چې وايي دغه ګولۍ يې خوب تختوي او مطالعې لپاره تر ډيره کيناستلی شي.
شريفي زياتوي، محصلين د ټابلېټ کا ګولۍ خوري په کافي اندازه نشه يي مواد پکې شتون لري او نورو نشه يي موادو په ډول زيانونه لري.
هغه وايي، د يادو ګوليو استعمال په ځوانانو په ځانګړي ډول په محصلينو کې زيات شوی او اندېښنه يې څرګنده کړه که مخه يې ونه نيول شي د ډيری ځوانانو ژوند به له خطر سره مخ شي.
که څه هم د لوړو زده کړو وزارت نه مني چې په پوهنتونونو کې دې د نشه يي موادو وکارول شي په وينا يې چې داسې اصول او قوانين وضع شوي چې د نشه يي موادو د استعمال مخه يې نيولې ده.
خو په عين حال کې د کابل پوهنتون محصلين تاييدوي چې ډير شمير ځوانانو د ټابلېټ کا او ټرېماډول ګوليو استعمال ته مخه کړې په وينا يې يادې ګوليو د پوهنتون په داخل کې هم په اسانه پيدا کيږي او ځوانان يې په فخر سره استعمالوي.
افغانستان ته د امريکا په راتګ سره د نشه يي توکو استعمال، کښت، د هيرويينو او تارياکو قاچاق او جوړول تر ټولو لوړې کچې ته رسېدلي چې له کبله يې زرګونه هېوادوال په ښارونو کې په نشه يي موادو روږدي شوي دي.
