(کابل ټکی کام چهار شنبه، مرغومي ۹ مه، ۱۳۹۴ل) :
د افغان ولسي جرګې غړو نن وويل چې د ( خلافت غږ) راډیو په ننګرهار ولایت کې د امريکايانو هوايي اډې څخه خپرونې کوي .
ولسي جرګې کې د کابل د خلکو استازي الله ګل مجاهد وويل د داعش (خلافت غږ) راډيو په ننګرهار کې د بهرنيو قواو له اډې څخه خپرونې کوي .
الله ګل دغه راز وويل چې داعش یوه پروژه ده او دغه پروژه د بهرنيو قواو له لوري تمويلېږي، همدارنګه نوموړي د ولسي جرګي له رئیس څخه په جدي ډول وغوښتل چې د ننګرهار ولایت لپاره دې یو ځانګړی پلاوی واستول شي ترڅو دغه قضیه له نژدې نه وڅاري .
د داعش راډيو چې د ایف ايم په څپو خپرونې لري د ننګرهار په مختلفو ولسواليو، مرکز کې او همدارنګه د ګاوندي هېواد په قبايلي سميو کې رڼې اورېدل کيږي، او په همدې اړه تېره ورځ د مشرانو جرګې هم دغه موضوع جدي وګڼله او په اړه يې اندېښنه وښ،دله او له دولت نه يې په جدي توګه د بندولو غوښتنه وکړه .
د ننۍ ورځې په غونډه کې د بلخ د خلکو استازي عبدالرحمان رحماني هم د الله ګل مجاهد خبرې تاييد کړې او په ټينګار يې وويل « که چېرته د خلافت غږ په د امريکايانو له بيز نه خپرونې نه لرلې، ما په دار وځړوئ »!
تر دې د مخه خلک په دې ګمان وه چې د داعش راډيو خپرونې د پاکستان قبايلي سيمو څخه کوي خو اوس خلکو ته سوالونه پيدا شوي دي چې دغه راډيو دلته د په افغانستان کې خپرونې لري .
په دې اړه د ولسي جرگې دويم مرستیال محمد نذیر احمدزی د جرګې امنیتي کمېټه په دې وګمارله چې د بهرنیانو له اډې نه دې پلټنه وکړي او په راتلونکو څو ساعتونو کې دې بېرته جرګې ته معلومات ورکړي .
په ولسي جرګه کې دغه اعتراضونه په داسې حال کې رامنځ ته کېږي، چې تېره ورځ د ولسي جرګې لومړي مرستیال او په ننګرهار کې د داعش په مقابل کې د ملېشو مشر ظاهر قدیر هم د شواهدو په ښوودلو سره وویل چې داعشي وسله وال د افغان دولت پېژندپاڼې لري .
سره له دې چې یو شمېر سیمه ییز چارواکي د داعش راډيو یوه ګرځنده راډیو بولي، خو د رسنیزې برخې مبصرين پر دې اند دي چې د راډيو د خپرونو کیفیت او رسنیز پوښښ دا په ډاګه کوي چې دا راډيو پرمختللی تخنيکي وسايل لري او د جلال اباد ښار په زړه کې رنې خپرونې کوي.
له دې وړاندې د ننگرهار ولایت ویاند عطاالله خوږیاڼي دغه تورونه رد کړي وه، چې د داعش راډيو دې له جلال اباد څخه خپرونې وکړي بلکه رسنیو ته يې ویلي وه چې د داعش راډیو له ډیورنډ کرښې څخه په هاغه خوا خپرونې کوي .
سلیم بریال
