همدا مهال د ملګرو ملتونو په مرکز، چې اسيايي هيوادونه يې ژنيو او برتانيه يې جينيوا بولي، د افغانستان سره په تيرو کلونو کې د شوو مرستو او کړو ژمنو په اړه غونډه لري، چې اشرف غني او ډاکټر عبدالله ورته د خيرات په تمه خانکونه پر سره ورغلي دي. د دې غونډې په اړه تر اوسه ازادو رسنيو هيڅ نه دي ويلي، چې د افغانستان لپاره به د مرستو په ژمنو تر کومه حده پريکړې وشي او يا به يواځې د تيرو ژمنو پخلى وکړل شي، خو افغان چارواکي تمه لري چې مخکې له افغانستان سره کومې مرستې شوې وې، د هغو په دوام به د پاتې مرستو ژمنې بيا تازه کړل شي.
افغان چارواکو تمه څرګنده کړې ده چې دوی سره به په ژنيو/جينيوا غونډه کې د غونډې برخوال نمايندګان په افغانستان کې د پانګونې، نورو مرستو، بهرنيو سودا ګرو او امنيت په ښه والي کې مرسته وکړي او هم به د سولې په اړه د روانو مذاکراتو ملاتړ څرګند کړي. د افغان چارواکو په وينا د افغانسان لپاره به ډير څه ترې تر لاسه کړل شي.
په تيرو غونډو کې چې په بروکسل او ژنيو کې د افغانستان د موجوده حکومت سره ژمنې شوې، څلويښت سلنې ورکړه يې کابل حکومت مني، چې تر لاسه کړې يې دي، خو پاتې شپېته سلنې پسې دواړو ډاکټرانو اشرف غني او عبدالله لنګونه وهلي، چې پايلې به يې د غونډې له پای ته رسيدو وروسته خپله وګوري.
د افغانستان موجوده حکومت لپاره دوه ځايونه شته، چې يو يې بروکسل او بل يې ژنيو، په دواړو مرکزونو کې په تيرو ١٧ کالو کې تر ٣٠ زياتې غونډې شوې دي، خو د افغانستان اقتصادي، زراعتي، روغتيايي، پوهنې او روزنې، سياسي او امنيتي حالت ورځ په ورځ مخ په خرابوالي روان دى.
روانې غونډې ته د نورو تمو تر څنګ افغان چارواکي د سولې د پر مختګ تمه هم لري. وايي چې د نورو هيوادونو د نمايندګانو تر څنګ به له دوو لوړ پوړو امريکايي چاراکو سره د غونډې په څنډه کې هم وګوري، هغوی به هم ورته په لمن کې يو څه واچوي، چې څه موده يې مخ په زوال حکومت پرې وپايي.
که اشرف غني او عبدالله د ژنيو د غونډې په څنډه کې له دوو امريکايي چارواکو (ديويد هليل او ميرمن اليس ولز) سره وګوري، هم له شوو ژمنو زيات څه ترلاسه کولاى نه شي. د ژنيو له غونډې شايد ډاکټر عبدالله او اشرف غني د دوو امريکايي يادو لوړ رتبه چارواکو سره بروکسل ته هم لاړشي، هلته به همغه بټ او همغه نينې وي، چې مخکينيو غونډو کې يې ژمنې شوې دي.
اشرف غني تمه لري چې څه به د ژنيو له غونډې او څه به په بروکسل کې د اروپايي ټولنې له غړو هيوادونو تر لاسه کړي، خو ګمان نه کيږي چې ډکه لمن به هيواد ته ستانه شي. اروپايي ټولنې په افغانستان کې په ميلياردونو ډالر مرستې وکړې، خو امريکايي ملکي او نظامي افسرانو د افغان لوړ پوړو چارواکو سره (نيمه ستا او نيمه زما) کړې، اوس اروپايي هيوادونه هم په افغانستان کې هغه ډول مرستو ته زړه نه ښه کوي، کومې يې چې له ۲۰۱۵م وړاندې کولې.
افغان حکومت خو به تبليغ کړي چې دوه ډاکټرانو له ژنيو غوڼدې ډير څه راوړل، اما دواړه به خپل جګړه کې ښکيل هيواد ته تشه لمن راستنيږي.
