(کابل ټکی کام ۱۳۹۷ لیندۍ ۱۸)
د ترکمنستان هیواد چارواکو له پاکستاني مقاماتو غوښتي چې خپل هیواد کې دې د ټاپي پروژې چارې روانې کړي
د ټاپي د ګازو نل لیکې د شرکت اجرايوي مشر محمد میرات امانوف د پاکستان د نفتو له وزیر غلام سرورخان سره په یوه ناسته کې له هغه غوښتي چې تر راتلونکي کال پورې د نل لیکې د غځولو لومړني کارونه پیل کړي.
نوموړی ویلي، پاکستان باید د ۲۰۱۹ کال په مارچ میاشت کې د ټاپي پروژې پرانیست غونډه جوړه کړي چې ترې وروسته به یې رسماً د یادې پروژې چارې پیل شي.
دا پروژه چې د طالبانو د واکمني پر مهال له ترکمن چارواکو سره افغانستان، هند او پاکستان لاسلیک کړې وه، په تیر ۲۰۱۶ کال کې یې پرانیسته وشوه او په ۲۰۱۷ کال کې یې چارې رسماً له هرات ولایت نه پیل شوې.
طالبانو د دې پروژې د ساتنې ټټر وهلی او د دوی تر واکمني لاندې ټولو هغو سیمو کې چې دا نل لیکه ترې تیریږي طالبان به یې څارنه او ساتنه کوي.
دا د سیمې په کچه تر ټولو ستره پروژه ده چې ۴ هیوادونه یې ګډونوال دي.
ددې پروژې له لاري افغانستان خپل صنعت ته وده ورکولای شي او د دې ترڅنګ د دولت په عوایدوکې به دنورو ټکسونوسربیره هرکال یوازي دګازو د صادراتو له کبله ۴۰۰ میلیونه امریکايې ډالره اضافه کیږي
ددې نل ليكې ټول اوږدوالى ۱۷۳۵ كيلومتره دى چې ۷۰۰ كيلومتره به يې یواځې د افغانستان له خاورې تېريږي.
د نل ليكې ۱۴۷ كيلومتره برخه به يې په تركمنستان او پاتې يې د پاكستان او هندوستان په خاوره كې تطبیقیږي.
