بدخشان امنيتي مسوولين: طالبانو نهه تنه بندي پوليس خوشې کړل
(کابل ټکی کام، ۱۳۹۷، مرغومی ۸)
د بدخشان امنيتي مسوولين وايي، طالبانو هغه نهه تنه پوليس خوشې کړي چې څو ورځې مخکې يې د نفوذي کسانو په مرسته نيولي و.
طالبانو د روان کال د دسمبر مياشتې په لسمه نيټه د يوې خبرپاڼه په خپرولو سره ويلي و چې د بدخشان مرکز فیض اباد اړوند په تپه تلويزيون سیمه کې د لسم ماموريت د چاپې پر مهال لس تنه پوليس ژوندي ونيول او د هغوی يوويشت ميله وسلې او په زياته اندازه مهمات هم لاسته ورغلل.
طالبانو هغه مهال ويلي و چې دا بريد يې په پوليسو کې د يوه نفوذي عسکر په مرسته ترسره کړی و.
تازه د بدخشان د امنيې قوماندانۍ وياند جاويد بدخشي وايي، د يادې پېښې نهه يا لس تنه پوليس چې طالبانو له ځان سره بنديان کړي و د قومي مشرانو په منځګړيتوب خوشې کړي دي.
د بدخشي په وينا، بندي پوليس د طالبانو له خوا تر خوشې کېدو وروسته ارغنج خواه ولسوالۍ ته رسېدلې دي.
دا مهال د بدخشان ولايت یمګان، وردوج او دره خشکک ولسوالۍ په بشپړه توګه د طالبانو تر حاکميت لاندې دي او د پاتې نورو ولسواليو پر زياتو سيمو هم طالب وسله وال واکمن دي.
تر اوسه طالبانو د یادو پوليسو د خوشې کېدو په اړه څه نه دی ويلي.
دا لومړی ځل نه دی چې طالبان په جګړو کې نيول شوي پوليس بنديان خوشې کوي بلکې تر دې مخکې يې هم د ځانګړو ورځو په مناسبت او اخترونو کې سلګونه بندي پوليس د ښه نيت له کبله په دې ضمانتونو او شرط خوشې کړي چې بيا به حکومتي ليکو کې دندې نه کوي.
