(کابل ټکی کام، ۱۳۹۷، مرغومی ۱۲)
د امريکا متحده ایالاتو د ولسمشر ډونالډ ټرمپ او په افغانستان کې د ناټو ځواکونو د پخواني قوماندان جنرال سټانلي مک کرسټل تر منځ لفظي شخړه رامنځته شوې چې دواړو يو بل ته سپک الفاظ کارولي دي.
مک کرسټل ويلي، چې ولسمشر ټرمپ يو غير اخلاقي، چلباز او دروغجن انسادی دی خو ټرمپ يې په ځواب کې ټويټ کړی او نوموړي ته يې د سپي لفظ کارولی دی.
ټرمپ په تازه ټويټ کې ليکلي، چې جنرال مک کرسټل د ولسمشر اوباما له لري د سپي په څېر له دندې وشړل شو.
مک کرسټل له افغانستانه د امریکايي ځواکونو په کمولو نيوکه کړې وه زياتوي چې دا کار د امريکا حيثيت زيانموي او دغه راز ټرمپ يې يو فريبکاره انساد یاد کړی و.
خو ټرمپ د دغه خبرو په ځواب کې په تازه ټويټ کې ليکي: “جنرال مککرستل د ولسمشر اوباما له لوري د سپي غوندې له دندې وشړل شو. د هغه وروستی ماموریت بد ترین تنزل و. هغه پوچه خوله لري او په احمقانه خبرو مشهور دی. د هیلري ملګری!”
په ۲۰۱۰م کال کې مک کرسټل د رولنګ ستون مجلې ته په يوه خصوصي مرکه کې د امريکا په مرستيال ولسمشر جوبايډن، د پاکستان او افغانستان لپاره د امريکا پر ځانګړي استازي هولبروک، په کابل کې د امريکا پر سفير او پر اوباما نيوکې کړې وې چې له امله يې نوموړی له دندې ګوښه او پر ځای يې ډيويډ پيټرايس وټاکل شو.
د امريکايي او ناټو ځواکونو دغه پخواني جنرال “مک کرسټل” شاوخوا درې اوونۍ مخکې دې هيل نشريې ته ويلي و چې پر يوه کمزوري حکومت طالبانو ته ماتې ورکول ستونزمن دي، دغه شخړه په يوې بستې ډالرو نه شي حل کېدلی او امریکا دې خپلو هيلو ته د رسېدو لپاره د خپلې ناکامۍ لپاره هم چمتوو و اوسي.
