کرکټ: د افغانستان ملي لوبډلې د ۲۰۲۰ شل اوريز نړيوال کپ ته لاره پيدا کړه
(کابل ټکی کام، ۱۳۹۷، مرغومی ۱۱)
د کرکټ نړيوالې شورا ای سي سي” نن د يوې خبرپاڼې په خپرولو سره ويلي چې د افغانستان کرکټ ملي لوبډلې د ۲۰۲۰م کال د شل اوريزو نړيوال جام سياليو ته لاره پيدا کړه او دغه لوبډله به په راتلونکي شل اوريز جام کې لوبيږي.
د خبرپاڼې له مخې، تر اوسه اته پياوړې لوبډلې د درجه بندۍ پر اساس شل د ۲۰۲۰م کال شل اوريزو سياليو ته لاره پيدا کړې چې افغانستان پکې اتم مقام خپل کړی دی.
په دغه شل اوريزو سيالیو کې دولس لوبډلې ګډون کوي چې د افغانستان په شمول اتو (هند، پاکستان، انګلستان، افغانستان، اسټراليان، نيوزيلنډ، سويلي افريقا او ويسټ انډيز) په مستقيمه توګه دغه سيالیو ته لاره موندلې او د پاتې څلور لوبډلو لپاره د غوراوي پړاو سيالۍ ترسره کېږي.
دا په داسې حال کې ده، چې د سريلانکا او بنګله دېش په څېر پياوړې لوبډلې هم نه دي توانېدلي چې په مستقيمه توګه شل اوريز جام ته لاړې شي، یانې دواړه لوبډلې د شل اوريزو سياليو په درجه بندۍ کې له افغانستانه ښکته دي.
ټاکل شوې ده، د ۲۰۲۰م کال شل اوريزې سيالۍ د همدې کال په اکوبر مياشت کې په اسټراليا کې کېږي.
باید وويل شي، چې افغانستان کرکټ ملي لوبډله د روان کال په نړيوال جام کې هم ګډون لري چې مئ او جولای کې مياشتو کې به په انګلستان کې ترسره شي.
