لوګر کې پنځه سيمه ييز پوليس طالبانو ته ژوندي په لاس ورغلي
(کابل ټکی کام، ۱۳۹۷، مرغومی ۱۵)
د لوګر ولايت په محمداغې ولسوالۍ کې طالبانو د سيمه ييزو پوليسو پر يوې پوستې چاپه اچولې ده.
طالب وياند ذبيح الله مجاهد وايي، تيره شپه طالبانو د يادې ولسوالۍ په دهنو سيمه کې د سيمه ييزو پوليسو پر يوې پوستې چاپه اچولې چې په پايله کې يې پنځه تنه پوليس ژوندي نيولي دي.
دغه راز نوموړی وايي، د پوليسو شپږ ميله وسلې او په زياته اندازه جنګي مهمات هم د طالبانو لاسته ورغلي دي.
تر اوسه د لوګر ولايتي چارواکو په رسمي توګه په دې اړه څه نه دي ويلي، خو يوې امنيتي سرچينې د پنځو تنو سيمه ييزو پوليسو د لادرکه کېدو خبر ورکړی دی.
په وروستيو کې طالبانو خپلې جنګي تګلارې بدلې کړي او د (ليزري قطعې، سرې قطعې، چريکي دلګۍ) په نوم ځانګړي کسان يې روزلي چې وخت ناوخت د هېواد په مختلفو سيمو او ښارونو کې پر امنيتي پوستو چاپې اچوي او تر ډيره يې عمليات بريالي وي.
