بلخ او فاریاب کې ۷۲ تنه امنیتي ځواکونه طالبانو ته ورغلي
(کابل ټکی کام ۱۳۹۷ مرغومی ۱۸)
راپورونه وایي چې د بلخ ولایت په خاص بلخ او د فاریاب په بندر ولسوالیو کې لسګونه امنیتي سرتیري له طالبانو سره یوځای شوي دي.
خبر زیاتوي، د خاص بلخ په ولسوالۍ کې تر شپیتو ډیر امنیتي ځواکونو خپلې دندې پریښې او د طالبانو لیکو ته ورغلي دي.
طالب ویاند ذبیح الله مجاهد د پیښې د پخلي ترڅنګ وایي،
“۵۳ پولیس، ۸ تنه د ملي اردو عسکر او ۲ تنه اربکیان د حقائقو په درک کولو سره له خپلو دندو لاس په سر او له مجاهدینو سره یوځای شول.“
نوموړی وایي، دا کسان د دوی د جلب او جذب کمیسیون په هڅو له طالبانو سره یوځای شوي دي.
په یوه بل خبر کې ویل شوي چې ۹ نهه تنه محلي پولیس دفاریاب بندر ولسوالۍ کې د طالبانو لیکو ته ورغلي.
طالب ویاند قاري یوسف احمدي وایي یوځای شوي امنیتي سرتیري د سردې، خم سفید او شیخ علي سیمو څخه له دوی سره یوځای شوي.
سرچینې وایي، طالبانو او سیمیزو خلکو د یوځای شویو امنیتي سرتیرو تود هرکلی کړی دی.
دولتي چارواکو په دې هکله تر اوسه څه نه دي ویلي.
