ډاکټر اشرف غني د نړۍ دوهم مفکر وښودل شو، دا خبر د تېر ځلې ټولټاکنو پر وخت ښه وځلېده، د دې خبر تر څنګ غني د خپل کمپاين په وخت کې له ولس سره ډېرې جالبې او زړه وړونکې ژمنې هم وکړې چې له کبله يې له سياست سره نااشنا ساده لوحو افغانانو کې محبوبيت زيات شو او ان ځينو لوستو او باخبرو خلکو هم خپل نېک اميدونه د نوموړي په ولسمشر کېدو پورې وتړل.
راځئ! دلته د نومړي يو څو ژمنو ته سرسريزه کتنه وکړو:
مفکره! تا ويل چې سترخوانونه به مو درډک کړم، اوس زمونږ په سترخوانونو کې هغه شته هم ختم شول، مخکې د غريبۍ کچه 38 سلنه وه خو په 2018 کې 54 ته لوړه شوه.
مفکره! خبره ريښتيا ده خو خبره د رسوايي ده
مفکره! تا ويل اروپا ته به ورتف کړئ! خو اوس راپورونه ښيي چې تېرو څلورو لسيزو کې نږدې سلګونه زره افغانان د اقتصاد او يو شمېر نورو ستونزو له امله د اروپا او ترکيې په ګډون ځينو نورو بهرنيو هېوادونو ته د کډوالۍ لپاره اړ شوي دي.
مفکره! خبره ريښتيا ده خو خبره د رسوايي ده
مفکره! د خپلې پاچاهۍ په اولو شېبو کې د امنيتي تړون په نوم د افغانستان (مور) قباله دې بهرينو ته ورکوله بیا د همدغو کفارو لخوا د افغانانو په بمبار کېدلو چپ پاتې کېدل او د خپلې پاچاهۍ د بقاء لپاره پر ډېورنډ کرښه تور پنجابي ته د اغزن تار د غځولو اجازه ورکولو سره خو دې ټولو افغانانو ته تاريخي پېغور پرېښود.
مفکره! خبره ريښتيا ده خو خبره د رسوايي ده
مفکره! تا ويل قانون به پر ټولو افغانانو يو شان پلی کېږي خو مونږ شاهدا يو چې د قيصاري او علي پور په ګډون دې د نورو زورواکانو سره پر قانون څه ډول معاملې وکړې!!
مفکره! خبره ريښتيا ده خو خبره د رسوايي ده
پر نورو ژمنو سربېره دې د ګردېز ـ غزني، ګردېزـ پټان او پکتيا حلقوي سړکونو جوړولو ژمنې دې هم کړې وې خو دا ژمنې دې لا هم تش په نوم پاته دي، او د عملي کار دې هيڅ څرک نه لګېږي. د صنعتي پارک، هوايي دهلېز او نورو ژمنو پوره کولو ته دې لا هم د لويې پکتيا وګړي په تمه دي.
مفکره! خبره ريښتيا ده خو خبره د رسوايي ده.
قدرمنو لوستونکو! په پای کې تاسو ټولو ته در پام کوم چې هغه لومړی مفکر به د کوم هېواد و، هغوی د انساني همدردۍ له مخې پر مونږ دا دا يو ډېر ضروري حق لري چې پوه يې کړو او دا پيغام ورته ورسوو: (که مو د خپل مفکر څخه هر څه جوړوئ! جوړ يې کړئ! خو خبردار! چې ولسمشر يې نکړئ! کنه هېواد به مو نه بيا هېواد کړئ! او نه به هم پکې اوسېدو ته پکې زړه ښه کړئ!)
