(کابل ټکی کام ۱۳۹۷ سلواغه ۱۹)
پخوانی افغان ولسمشر او د مسکو په ناسته کې د ګډونوالو افغان سیاسي څیرو مشر حامدکرزی وایي، د روان بحراني وضعیت د کابو کولو او له دغه وضعیت څخه د ایستلو پر لارو چارو د بحث لپاره اړتیا ده څو لویه عنعنوي جرګه راوبلل شي.
کرزي د اسپونتیک خبري اژانس ته په یوه مرکه کې ویلي، “ د لویې جرګې لپاره شرایط برابر شوي، په بیړنیو حالاتو کې د افغانستان د خلکو اصلي مرجع لویه جرګه ده او د افغانستان له اوسني وضعیت څخه د وتلو غوره لار هم د لویې جرګې راغوښتل دي، خو په موقعیت یې بحث شونی تر څو یوې حل لارې ته ورسیږو“
بل خوا بیا د ملي یووالي د حکومت مشر اشرف غني له دې کبله چې د شنونکو په باور، خپله بقاء د دغې جرګې په رابللو کې نه ویني، د لویې جرګې مخالفت کوي او دغه ډول غونډې بې ګټې بولي.
په عین حال کې ډاکټر عبدالله بیاټینګار کوي چې د سولې په موخه د هر هغه اقدام ملاتړ کوي چې له روان بحران څخه د وتلو لار روښانه کوي.
