د مسکو غونډه او ګټې يې

ليکوال : احمد منصور
د تېرې سه شنبې په ورځ په مسکو کې د اسلامي امارت د سياسي دفتر استازو او د حکومت د اپوزيسيون غړو ، څه پخوانيو حکومتي چارواکو او څه پکې هغه خلک وه چې له اوسني مزدور حکومت سره د نظرونو اختلاف لري ګډه غونډه دايره کړې وه.
د طالبانو لس کسيزه پلاوی وه چې مشري يې عباس ستانکزي صاحب کوله او د هغوی پنځوس کسيزه پلاوی چې مشري يې حامد کرزي کوله ، بعضې هېوادوال د امارت دا عمل مناسب نه بولي او دليل ورته دا نيسي چې په دې غونډه کې هغو څېرو هم ګډون کړی وه چې لاسونه يې د ملت په وينو سره دي.
د دوی په آند له ورته خلکو سره ناسته او ګډ کانفرانس جوړول له امت او ملت سره ستره جفا ده او د امارت په زيان يې بولي که ووايو چې دا کانفرانس په نړی کې د امارت حيثيت به کم کړي او يا به ستر زيان و ګالي که د زيان خبره شي له دې مخکې هم داسې افعال ترسره شوي چې بعضې دوستانو د امارت په زيان بلل خو الحمدلله چې هغه د امارت په نفعه تمام شول د نمونې په ډول يې دوه مثاله درته ښايم :
۱ – اتلس کاله د مخه چې امريکا له امارت څخه شېخ اسامه صاحب غوښت خو ملا صاحب هر ځل ورته انکار کاوه هغه وخت کې هم بعضې خلکو د شېخ صاحب نه سپارل د امارت په زيان باله او ويل يې چې ملا صاحب ولې د يو کس لپاره ټول ولس په سره اور کې سوځوي خو مونږ وليدل چې د شېخ صاحب نه سپارل نه يوازې د امارت بلکې د ټول امت په ګټه تمام شول عربو خپل بيعت له امارت سره تازه کړ که چېرې يې سپارلی وی نو عربو به نه يوازې امارت سره په خپل بيعت نه وی درېدلي بلکې د امارت په ړنګولو به يې لاس پورې کړی وی امت به متفرقه شوی وه او د عربو او عجمو خپل منځي جنګ به پيل شوی وه چې همدا د کفارو له اهدافو څخه يو ستر هدف وه لنډه دا چې د شېخ صاحب نه سپارل تر ډېره حده د امت په متحد کېدو کې مرسته وکړه .
۲ – همداسې چې کله تېر کال مزدور حکومت په وړوکي اختر کې اوربند اعلان کړ اسلامي امارت هم د دښمن له پوچو تبليغاتو څخه د ځان ساتلو او په اوربند کې د مصلحت ليدلو له امله يې درې ورځنی اوربند اعلان کړ چې تر ډېره حده د ولس لخوا د طالبانو دا عمل وستايل شو هغه وخت کې هم څه دوستانو د طالبانو لخوا د اوربند اعلانول مناسب و نه باله دليل يې دا نيوه چې څنګه هغو خلکو ته امن ورکړو ، خپلو کورو ته يې را پرېږدو چې د همدوی له امله مو کورونه له کونډو او يتيمانو ډک دي خو چې کله طالبان ښارو ته لاړل همدغو دوستانو د شهيدانو له وينو سره خيانت وباله.
طالبانو له وخت څخه نفع واخيسته پوليس او اربکيان يې په دې وپوهول چې تاسو د پردو لپاره قرباني کېږی او خپل خلک وژنی ، ځای ځای يې ورته وعظونه وکړل د اوربند ګټه دا شوه چې د اختر له څلورمې ورځې د پوليسو ، اربکيانو او کمانډويانو د تسليمی لړی پيل شوه او په مختلف ولايتو کې تسليم شول د دوی د تسليمی لامل دا وه چې طالبان يې له نېږدې وليدل پوه شول چې څه ويل کېدل طالبان پاکستانيان دي يا د هغوی د مفادو لپاره جنګېږي تش افواهات او تبليغات ول .
له دې غونډې څخه د طالبانو هدف څه وه ؟
له دې غونډې څخه هدف د هېواد د هغو جهتو سره چې د نظرونو اختلاف لري او د بهرنيانو له شتون سره يو ډول مخالف دي د اسلامي امارت برحقه داعيه رسول او هغوی په دې قانع کول چې اوسنی جګړه په تېلو ، طبعي زېرمو او يا په اوبو نه ده روانه بلکې اوسنی مسئله د مسجد او کليسا ده له هغو خلکو سره ده چې د نړيوال قانون خلاف يې زمونږ خاوره اشغال کړې ، زمونږ هغه نظام يې را ړنګ کړی چې ټول ولسونه مو پرې را ټول ول او هغه جنايات يې ترسره کړل چې قلم يې له ليکلو ، غوږونه يې له اورېدلو او خوله يې له ويلو عاجزه ده .
ګټه يې د طالبانو لپاره څه وه ؟
لکه څرنګه چې تاسو ته معلومه ده کله چې وحشي وروسان زمونږ له هېواده شرمېدلي او ذليله ووتل هېوادوال په دې تمه ول چې اوس به د ورکړل شوو قربانيو او تېر شوو تکاليفو په عوض کې اسلامي نظام وګورو او د هغه نظام لاندې به په امن او سکون ژوند تېر کړو خو افسوس چې د ملت دغه ارمانونه د څو د چوکيو مجنونانو د خيانت له امله له خاورو سره خاورې شول ، خپل منځي جنګونه پيل شول ، د ولس نه مال ، نه عزت او نه سر په امن کې وه ، د هغو جګړو لاملونه زيات دي دوه لوی لاملونه يې دا دي: ۱) د واحدې قومندې نه شتون. ۲) اسلام ته په پوره ډول نه معتقد کېدل .
نو اوس امارت هم د هغه تاريخ له تکراره وېره لري چې هسې نه بيا ځل خپل منځي جنګونه شروع نه شي او د ولس قربانی عبثې لاړې نشي نو ځکه له هغو جهتو يا سياسي احزابو سره ګوري چې په ولس کې د هغوی خبرې منلې کېږي او تر شا يې اقوام ولاړ وي لکه د مثال په ډول حامد کرزی او د اوسني مزدور حکومت د سولې کمېسيون رئيس .
د کرزي تر شا اوس هم اکثره قندهاريان ولاړ دي هغه قندهاريان چې له طالبانو سره يو ډول مخالفت لري ، همداسې د سولې کمېسيون د رئيس تر شا هزاره قوم ولاړ دی او د ده خبره تر ډېره هزاره ګان مني له ورته خلکو سره ناستې تر ډېره حده به ګټورې تمامې شي ځکه د خپل منځي جګړو مخه به ونيولی شي.
هېوادوال دې مطمئن اوسي هېڅکله به د شهيدانو له وينو سره خيانت نه کېږي او نه به په نظام سودا کېږي له سياسي احزابو سره ورته غونډې دايرول د وخت ضرورت دی او مشران پکې مصلحت ګوري .