(کابل ټکی کام ۱۳۹۷ کب ۷)
د پکتیا ولایت د زرمت ولسوالۍ د هغې کورنۍ غړي چې تیره میاشت یې پر کور هوایي برید وشو، وایي؛ حکومت ورسره ژمنه کړې وه چې د دغې قضیې څیړنه به کوي، خو لا یې په هکله کوم اقدام نه دی شوی.
په دغه بمبار او شپنۍ چاپه کې د سولې شورا د ولايتي کمېټې غړی او قومي مخور قوماندان نعيم فاروق او د نوموړي يو ورور او درې محصلين ځامن د امریکایي او افغان ځواکونو لخوادشهیدان او د کور په ګډون ګڼ مالونه یې له خاورو سره خاورې شول.
د دې کورنۍ مشر غلام محمد صالح رسنیو ته ویلي، تر پیښې وروسته ورته د مشرانو جرګې يوه پلاوي او د پکتيا مرستيال والي زرمت ته ورغلل او له يادې کورنۍ سره یې ژمنه وکړه چې پېښه به څېړي او له عاملينو سره به يې قانوني چلند کېږي.
دغه راز دواړو پلاوو وعده ورکړې وه چې له اشرف غني سره به یې د مخامخ خبرو لپاره موقع هم ورته برابروي.
نوموړی زیاتوي، اوس چې له دې پیښې تر یوې نیمې میاشتې زیات وخت تیریږي، هیچا یې دوسیه نه ده څیړلې، نه یې د کورنۍ قاتلین مجازات شوي او نه هم له ولسمشر سره د لیدنېوخت ورکړل شوی دی.
بلخوا بیا د پکتیاوالي شمیم خان کټوازی وایي، چې دوی خپل مسؤلیت ترسره کړی او د یوه رسمي مکتوب له لارې یې له ولسمشر سره د دغو کسانو د ملاقات غوښتنه کړې ده.
نوموړی وایي ”د دوی کورنۍ ته مو هم په کابل کې او هم دلته فاتحه کړې، د دوی اخري غوښتنه دا وه چې موږ ته دې له ولسمشر سره وخت واخيستل شي او زموږ توانايي هماغه وه چې رياست جمهوري ته مو د ارګانهای محل له لارې رسمي مکتوب لېږلی، څو له ولسمشر سره يې له نږدې کېنوو“
کټوازی د دوسیې د څیړنې په هکله له څه ویلو ډډه کوي او زیاتوي چې دا چاره د نوموړي تر صلاحیت پورته ده.
د یادونې وړ ده چې دغه عملیات د خوست د کمپاین عسکرو او امریکایانو لخوا ترسره شوي وو چې په همهاله توګه دوه ځایونه په نښه ګرځول شوي و او په دواړو سیمو کې په لوی لاس عام هیوادوال وژل شوي و..
