يونسکو د غور جام منار ژغورلو لپاره دوه ميليونه ډالره مرسته کوي
(کابل ټکی کام، ۱۳۹۸، غبرګولی ۵)
د ملګرو ملتونو د علمي او کلتوري ادارې (يونيسکو) له خوا د غور ولايت د جام منار د ژغولو لپاره د دوه ميليونه ډالرو د مرستې اعلان وشو.
د اطلاعاتو او فرهنګ وزارست سرپرسته حسينه ساپۍ وايي، يونيسکو د یاد څلي د بيارغونې او ژغورنې لپاره د دوه ميليون ډالرو مرسته کوي خو په دې شرط چې لومړی به حکومت به د دغه کار د ترسره کيدو لپاره له سلو تر دو سوو زرو ډالرو لګښت ورکوي.
دغه راز د يونيسکو سلاکار عمران خان مقصودي هم تاييدوي چې یادې ادارې د منار جام د ژغورنې لپاره د دوه ميليون ډالرو مرسته اعلان کړې په وينا يې سربيره پر دې به يونيسکو د افغانستان د اطلاعاتو او فرهنګ وزارت سره په نورو برخو کې هم مرستې وکړي.
له تيرو څو ورځنيو سختو ورښتونو له کبله سيلابونه راوتلي و چې په دغه ولايت کې يې د اتو پيړيو څلی د نړيدو له ګواښ سره مخ کړی دی.
ويل کيږي، سيلاب پر جام منار ورغلی خو سيمه ييز حکومت د خلکو په مرسته توانيدلی چې د سيلاب اوبه له جام منار څخه په بل خوا واړوي.
جام منار چې له رغولو يې شاوخوا اته سوه کاله تيريږي د سلطان شهاب الدين غوري په دور کې په ډير ښکلي ډول له خښتو رغول شوی او ۶۲ متره اوږدوالی لري چې د ملګرو ملتونو د کلتوري ميراثونو په نوملړ کې هم ثبت شوی دی.
له یاد څلي چې نږدې اته پيړۍ تيريږي د سيند پر غاړه ولاړ دی او وخت ناوخت د دغه څلي د خوندي نه ساتلو په اړه شکايتونه شوي.
