(کابل ټکی کام، ۱۳۹۸، غبرګولی ۲۰)
په افغانستان کې د ملګرو ملتونو مرستندوی دفتر یوناما په تازه خپره کړې اعلاميه کې ويلي، چې د روژې مياشت کې په قصدي ډول د وسله والو مخالفينو له خوا ملکي خلک په نښه شوي دي.
په اعلاميه کې د کومې ډلې ځانګړی نوم نه دی ذکر شوی خو یوازې پکې راغلي چې د وسله والو مخالفينو له خوا په چاوديدونکو توکو او وسله والو بريدونو کې ملکي خلکو ته زياته مرګ ژوبله اوښتې ده چې طالبانو ورته غبرګون ښودلی دی.
طالبانو د یوناما د اعلاميې په غبرګون کې په يوه خپره کړې بيانيه کې ويلي، اسلامي امارت یوازې د هغو بريدونو مسؤل دی، ځواب ورته لري چې مسؤوليت يې منلی زياتوي ډيری بريدونه د داعش یا نورو کړيو له خوا کيږي چې د مخالفينو تر عنوان لاندې يې طالبانو ته منسوبول د یوناما دسيسه ده.
طالبان وايي، د روژې مياشت کې يې د کابل په شمول په ټول هيواد کې داسې بريد نه دی کړی چې ملکي خلکو ته دې زیان اوښتی وي.
طالبانو ويلي، د امريکايانو له خوا مدرسې، مسجدونه، کلينيکونه، کورونه، بازارانونه او عامه ځايونه د بمباريو هدف ګرځي په وينا يې : “موږ په کراتو له یوناما او نورو بشری نهادونو څخه غوښتي چې که دوی واقعا د انسانانو له ژوند سره دلچسپي لري، د جنایاتو په اړه د مسئولیت احساس کوي او پرې خفه کیږي، د مبهمو تورونو او یوطرفه قضاوتونو پرځای دې په واضح ډول واقعي جنایت کاران او هغوی چې د انسانانو په سر هره میاشت په زرګونه ټنه باروت اوروي وغندي او په وړاندې دې يې ښکاره موقف ونیسي”.
طالبان وايي، دوی حق لري هغه بنسټونه په نښه کړي چې د یرغل دوام ګرځي او د امريکايانو په خدمت بوخت دي زياتوي د یوناما له خوا د ورته ډول شبکو ملکي بلل او په عين حال کې چې هره ورځ په بمباريو کې ښځې او ماشومان وژل کيږي په هغې سترګې پټول دا ثابتوي چې یوناما د امریکايي سفارت په خوله غږیږي او د هغوی د مزاج خبرې کوي.
د يادونې ده، چې له تيرو څو مياشتو راهيسې د هيواد په بيلابيلو ولايتونو کې هره شپه د ګډو ځواکونو له خوا شپني عمليات کيږي چې ملکي خلکو ته پکې مرګ ژوبله اوړي خو تر اوسه یوناما، بشري بنسټونو او مسؤولو چارواکو د يادو تلفاتو د مخنيوي په اړه لازم اقدامات نه دي کړي او نه يې هم په خپلو راپورونو کې د پام وړ یادونه کيږي.
