خاکسار
دا چې په نن سبا پرمختللې ټکنالورژۍ کې خلک د دې لپاره چې اواز يې تر لرې لرې ساحو پورې ورسېږي، لاوډسپيکر کاروي، خصوصاً کله چې کومه غونډه دايرېږي نو بيا خو لاوډسپيکر ته اشد ضرورت وي، او لاوډسپيکر بيا د غږ پورته کولو داسې يوه اله ده چې ستا غږ که هر څنګه وي؟ که هر څه وايې؟ د لاوډسپيکر بيا په دې کار نشته چې څه دي او څه نه دي؟ بلکې يوازې د غږ پورته کولو وظيفه اجراء کوي.
معنا دا چې زمونږ د هېواد اوسنی ولسمشر غني هم هو به هو د لاوډسپيکر په څېر حيثيت لري، ځکه چې لاوډسپيکر هم د غږ رسولو دنده لري او ولسمشر غني هم د غږ رسولو دنده لري، بلکې که بې تعصبه خبره وکړو او هغه د چا خبره سپينه يې ووايو نو تر ولسمشر غني بيا لاوډسپيکر په دې ښه دی چې د هر چا غږ پورته کوي، داسې نه چې د ظالم غږ پورته کوي او بیا د مظلوم غږ ته يې ملا ماته وي. مګر ولسمشر غني بيا له لاوډسپيکر نه ځکه ښکته درجه کې راځي چې دی يوازې د امريکا غږ اوچتولی شي، يوازې هغه څه ته غوږ ږدي کوم چې امريکا يې وايي، يوازې هغه څه وايي کوم چې د امریکا خوښه وي، نو پدې خاطر وايو چې ولسمشر غني هغه لاوډسپيکر دی کوم چې يوازې د امریکا غږ پورته کوي، او د بل چا غږ نشي پورته کولی.
پورتنۍ خبرې تر دې پورې رايادې شوې چې ولسمشر غني تېره ورځ اعلان کړی وو چې ګواکې په سلګونو بنديان به د هېواد له مرکزي زندانونو خوشې کوي، که څه هم د ولسمشر غني دغه اقدام ځينو شنونکو او د ولسمشر د ګروپ ځينو غړو وستايلو، خو ځينې شنونکي بيا وايي چې دغه اقدام که څه هم د ولسمشر له خولې اورېدلی شوی دی، خو اصلاً د امريکا او طالبانو تر منځ د هغو خبرو پايله ده چې دواړو ډلو نه دي اعلان کړي. او دغه اقدام هم د امریکايانو له لوري بلل شوی دی خو د شنونکو په وينا د بنديانو د خوشې کولو په دې اعلان کې ولسمشر غني يوازې د لاوډسپيکر حيثيت لرلی دی،
همدا شان دوی وايي چې ولسمشر غني دومره واک نه لري چې د امريکايانو له وينا او امر پرته دې دا ډول ستر اقدام وکړي.
خو بل لورته که وګورو او قضاوت وکړو نو راته ښکاره به شي چې طالبان بيا هر وخت له خبلو زندانونو څخه د دولتي ځواکونو نيول شوي بنديان ازادوي او نوموړي بنديان بيا په رسنيو کې د طالبانو د ښه چلند کيسې کوي خو دولت بيا د طالبانو د دې اقدام پر وړاندې تل غلط تبليغات کوي او دغه اقدام غلط او نا سم تعبيروي.
په پای کې بايد ووايو چې د ولسمشر غني د بنديانو د خوشې کولو اقدام که څه پر ځای او غوره اقدام دی، خو دا چې امر د بل چا دی او خوله د ولسمشر ده نو ځکه خو د شنونکو په باور د تأسف ځای او د تأسف وخت دی، چې ځانته د افغانستان ولسمشر هم وايي او بيا د څو تنو بنديانو د خوشې کولو واک هم نه لري.
