(کابل ټکی کام، ۱۳۹۸، چنګاښ ۲)
د راپور له مخې، د کندز ولايت د امنيې قومندانۍ په داخل کې یوه عسکر د پوليسو پر مشر ډزې کړي او نوموړی وژل شوی دی.
راپور زياتوي، د کندز ولايت د پوليسو د ټولي قومندان عبدالوهاب یوه پوليس سره لفظي شخړه کړې او وروسته د پوليس له خوا پرې ډزې وشوې، چې روغتون ته پر لاره يې ساه ورکړه.
امنيتي سرچينې وايي، چې بريد کوونکی پوليس د قومندان عبدالوهاب خپل ساتونکی و او تر لفظي شخړې وروسته یاده پېښه رامنځته شوې ده.
بريد کوونکی پوليس د پيښې له ځایه تښتيدلی خو ځينې سرچينې وايي، نوموړی پوليس قومندانۍ ته نږدې په یوه کور کې کلابند دی.
تر اوسه د کندز امنيتي مسؤولين په دې اړه لا ډير جزيات نه دي ورکړي او دا هم نه ده معلومه چې دغه لفظي شخړه په څه شي رامنځته شوې ده.
تر دې مخکې هم د افغان پوځ په ليکو کې د عسکرو له لوري خپل ملګري عسکر او چارواکي په وسله والو بريدونو کې وژل شوي چې د يو شمير بريدونو مسؤوليت يې طالبانو منلی چې په وينا يې د پوځ په ليکو کې نفوذي بريد کوونکي لري.
خو تر اوسه طالبانو هم د ياد بريد په اړه څه نه دي ويلي.
