(کابل ټکی کام، ۱۳۹۸، چنګاښ ۱۰)
د راپورونو له مخې، طالبانو د تيرو ۲۴ ساعتونو په موده کې د هيواد په بيلابيلو ولايتونو کې د دولت په نظامي تأسيساتو، پوستو او پوځي قرارګاوو بريدونه کړي چې په وينا يې له دوه نیم سوه زياتو عسکرو ته يې مرګ ژوبله اړولې ده.
طالب وياند ذبیح الله مجاهد کابل ټکی کام ته په رالېږلې خبرپانه کې ويلي، د هيواد په درويشت ولايتونو کې د طالبانو له خوا په نظامي مرکزونو، پوستو، پوځي قطارونو او اهدافو دوپنځوس لوی او کوچني بريدونه ترسره شوي چې په ترڅ کې يې د لس قومندانانو په شمول ۱۷۳ عسکر، پوليس او اربکيان وژل شوي، پنځه اويا تنه نور ټپيان دي.
خبرپاڼه کې راغلي، چې د يادو بريدونو پر مهال پنځه عسکر طالبانو ژوندي نيولي او یو تن په خپله خوښه تسليم شوی دی.
د مجاهد په وينا، په یاده موده کې یوه ولسوالۍ، یوه قرارګاه او دوويشت پوستې، ۸۶ میله سپکې او درنې وسلې طالبانو نيولي او ګڼ پوځي وسایط ویجاړ شوي دي.
طالبانو په دغه ټولو بريدونو کې د خپلو يوولس تنو د وژل کيدو او نهه نورو د ټپي کيدو خبر ورکړی دی.
دغه راز خبرپاڼه کې راغلي، چې د غور تيموره ولسوالۍ مربوط د زيرني، د دایکندي کجران ولسوالۍ پدګګ- کندو او د هرات اوبې ولسوالۍ په ګڼ اباد سيمو کې طالبانو تصفیوي عمليات کړي چې په پايله کې ګڼې سيمې چې د کورونو شمير يې نهه سوه ته رسيږي د دوی تر حاکميت لاندې راغلي دي
په وروستيو کې طالبانو خپلو پوځي عملياتو ته زور ورکړی چې د هيواد په بيلابيلو سيمو کې يې له دولتي ځواکونو ګڼې پوستې، مرکزونه او سيمې نيولي دي.ږ
تيره ورځ د امريکا نيويارک ټايمز ورځپاڼه په یوه مطلب کې ليکلي و چې د تيرو دو ورځو په موده کې د افغان پوځ او طالبانو ۳۰۰ غړي د جګړو په ترڅ کې وژل شوي دي.
