کابل ټکی کام( سه شنبه، ۱۸چنګاش، ۱۳۹۸)
ایران وروسته له هغه له لویدیځ سره لاس او ګریوان شوی چې برېتانیا په جبل طارق کې د ایران د تیلو یوه کښتۍ ونیوله.
د جبل طارق حکومت چې په داخلي چارو کې ازاد دی، بهرنی سیاست یې د بریتانیا د حکومت تابع دی.
چارواکو د جبل طارق سترې محکمې ته امر کړی چې ۱۴ ورځې دې دا بیړۍ وساتل شي خو ایران دې کار سخت غصه کړی دی.
تازه د ایران د وسله والو ځواکونو لوی درستیز جنرال محمد باقري د برېتانیا دغه کار غندلی او ویلي یې دي چې ځواب به یې ورکړي.
تسنیم خبري اژانس د باقري له خولې لیکلي چې برېتانیا د ایران د تیلو کښتۍ په جعلي او جوړو شویو پلمو نیولې خو په وینا یې چې د دې عمل ځواب به پاتې نه شي.
تیره ورځ د ایران د دفاع وزارت هم د برېتانیا لخوا د دوی د کښتۍ نیول یو غلط اقدام بللی وو.
همدا راز د سپاه پاسداران ځواک هم ګواښ کړی وو چې دوی به د خپلې بیړۍ د نیولو په غبرګون کې د برېاتانیا کښتۍ تر خپلې ولکې لاندې راولي.
