(کابل ټکی کام، ۱۳۹۸، زمری ۲۶)
امريکا امر کړی چې هغه ايرانۍ تېل وړونکې بېړۍ بايد ونيول شي چې یوه ورځ مخکې يې له جبل الطارق نه اجازه ورکړې وه.
د امريکا د عدليې وزارت په یوه اعلاميه کې ويلي چې یادو بيړيو پر ايران د لګول شويو بنديزونو سرغړونه کړې، د پيسو سپينولو او ترهګريزو چارو کې هم برخه لري.
اعلاميه کې راغلي، چې یاده بيړۍ دا مهال هم د جبل الطارق په اوبو کې ده او په ناقانونه توګه سوريې ته تېل وړي.
یاده بيړۍ تيره مياشت درول شوې وه او په دريدو يې شپږ اوونۍ تيرې شوې خو وړمه ورځ جبل الطارق کې يوې محکمې په ضمانت د خوشې کولو امر وکړ چې سوريې ته به تيل نه لېږدوي.
ایران ويلي د بيړۍ خوشې کولو ضمانت کې يې ژمنه نه ده کړې زیاتوي چې سوريې ته يې تېل نه لېږدول.
د دغه بيړۍ له نيول کيدو وروسته ايران په هرمز تنګي کې د برتانيا یوه تيل وړونکې بيړۍ نيولې وه.
په وروستيو کې امريکا پر ایران بنديزونه زيات کړي چې ورسره په هرمزتنګي کې د بيړيو درولو، نیولو او ورته ډول پيښې زياتې شوي دي.
